Jon Irazabal, Durangoko Azokako zuzendari ohia, hil da

Jon Irazabal Agirre, hainbat urtez Durangoko Azokako zuzendari izandakoa, hil da ostegun goizaldean Usansoloko Ospitalean. Durangaldeko historian aditua, hainbat liburu kaleratu zituen Gerra Zibilaren garaiai buruz.

1960an Iurretan jaioa, 17 urterekin sartu zen Gerediaga elkartean Irazabal, eta lan ugari egin ditu bertan urte hauetan guztietan; besteak beste, Durangoko Azoka antolatzen aritu zen hiru hamarkadatan eta zuzendari lanetan ere bai 20 urtez. Gerediagak sare sozialen bidez eskertu dio hainbat urtez egindako lana.

Jon Irazabal Agirre elkarteko kidea eta lankide ohia gaur goizaldean zendu da.
¿Durangerrikook asko zor dizugu
Goian bego! pic.twitter.com/a2aJbdwUkX

— Gerediaga Elkartea (@Gerediaga) August 22, 2024

Liburuez gainera, historia izan zen bere beste pasioa. Durangaldeko historian aditua zen eta hainbat liburu kaleratu zituen, bai Gerra Zibilaren eta Frankismoaren garaiari buruz, baita bertako ohiturei buruz ere. Aipatzekoak dira, besteak beste, Iurretako kofradiak: iraganari etorkizuna ematen eta Durango, 1937ko martxoak 31, bonbardaketa.