Pilota
ZESTA-PUNTA
Lehen aldiz jokatuko da emakumezkoen Jai Alai Liga
EITB MEDIA
Lehen edizioak 10 txapelketa izango ditu, besteak beste, martxoaren 7an hasiko den Euskotren Winter Series lehiaketa.
2025 honetan emakumezko puntistek ere Jai Alai League txapelketa jokatzeko aukera izango dute lehen aldiz, arduradunek asteazken honetan iragarri dutenez. Ligaren lehen edizioan 10 txapelketa lehiatuko dira Euskal Herri osoan zehar, haien artean martxoaren 7an hasiko den Euskotren Winter Seriesaren hirugarren edizioa, Durangoko Ezkurdi frontoian. Txapelketa hori eitb.eus-en eta ETB1en jarraitu emango da, astelehenetan.
Denboraldia hasia da dagoeneko, abenduaren 27tik urtarrilaren 10era jokatu zen Berriatua Master Seriesarekin. Bertan, Ihart-Arai bikotea atera zen garaile.
Emakumeen Euskotren Winter Seriesa Durangoko Ezkurdi frontoian lehiatuko da beste urte batez. Aurten ere lau bikote arituko dira aurrez aurre: Maite-Maialen, Helena-Arai, Ihart-Frida eta Elaia-Oaia. Partidak martxoaren 10, 17 eta 24an jokatuko dira, arratsaldeko 19:30tan hasita, eta EITB Mediak emango ditu.
Hauek dira denboraldian zehar jokatuko diren txapelketak:
1. BERRIATUA MASTER SERIES (Abenduak 27-Urtarrilak 10): IHART-ARAI
2. ARABA EUSKARAZ MASTER SERIES (Martxoak 7-21)
3. EUSKOTREN WINTER SERIES (Martxoak 10-24)
4. LEKEITIO MASTER SERIES (Apirilak 5-17)
5. ZUMAIA MASTER SERIES (Apirilak 7-21)
6. BILBAO IRON CUP (Maiatzak 16-30)
7. MUTRIKU MASTER SERIES (Uztailak 11-25)
8. DONIBANE LOHIZUNE (Data gabe)
9. BIARRITZ (Data gabe)
10. FINAL FOUR
Euskotren Winter Seriesen, honako hau izango da egutegia:
Martxoaren 10ean, lehenengo finalerdia: Maite-Maialen vs Helena-Arai.
Martxoaren 17an, bigarren finalerdia: Ihart-Frida vs Elaia-Oaia.
Martxoaren 24an, finala.
Banakako Seriesen, sei puntista
Horrez gain, Banakako Series txapelketa ere aurkeztu dute, hau da, gizonezkoen banakako txapelketa. Ezkurdin jokatuko dute hori ere, eta hau da egutegia:
Martxoaren 3an, final laurdenak: Olharan vs Laduche eta Barandika vs Urreisti.
Martxoaren 10ean, lehen finalerdia: Erkiaga vs Barandika edo Urreisti.
Martxoaren 17an, bigarren finalerdia: Johan, vs Olharan edo Laduche.
Martxoaren 24an, finala.
