Pilota
Zesta-punta
Johan eta Gorka, Jai Alai Leagueko lehenengo finalistak
EITB MEDIA
Sorozabal anaiek hiru setetan menderatu dituzte Laduche-Del Rio (15-10, 4-15 eta 5-4). Bigarren bikote finalista datorren astelehenean zehaztuko da, Erkiagak eta Basquek Barandika eta Lopezen aurka jokatu ostean.
Johan eta Gorka Sorozabal anaiek Jai Alai Leagueko Lauko Finaleko finalerako txartela lortu dute, astelehen honetan Durangoko Ezkurdi pilotalekuan jokatutako lehen finalerdian Laduche eta Del Rio mendean hartuta, hiru setetan.
Sorozabal anaiek ondo hasi dute partida, lehen jokoa 15-10eko emaitzarekin eramanez. Bigarrenean, ordea, panorama erabat aldatu da. Laduchek eta Del Riok atsedenaldia aprobetxatu dute eta gehiago zentratuta atera dira kantxara, norgehiagokan nagusituta 4-15eko emaitzarekin jokoa irabazteko.
Dena berdinketa hausteko hirugarren jokoan erabaki da, non bi bikoteak 4 tantorekin berdinduta egon diren. Azkenean, balantza Sorozabalen alde makurtu da eta finalerako txartela lortu dute.
Bigarren bikote finalista datorren astelehenean zehaztuko da, Erkiagak eta Basquek Barandika eta Lopezen aurka jokatu ostean.
