Arrauna
Kontxako Bandera
Arraun Lagunakek eta Urdaibaik duela urtebete lortutako garaipena errepikatu dute 2024ko Kontxako Banderan
EITB MEDIA
Donostiako klubak bere historian hirugarrenez irabazi du denboraldiko banderarik garrantzitsuena, eta Bermeokoak zortzigarrenez. Biek ala biek irabazi egin zuten 2023an, eta aurten errepikatu egin dute.
-
Arraun Lagunak eta Urdaibaiko arraunlariak Kontxako Banderako garaikurrekin. Argazkia: EFE
Albisteak (2)
Bideoak (11)
-
-
Gorka Aranberri: ''Sekulako lana egin dugu, eta uste dut merezitako garaipena izan dela''
-
Aiora Belartieta, emozioz gainezka Kontxako Bandera bereganatu ostean
Igandean, Kontxako Banderaren bigarren jardunaldia jokatu dute Donostian (emakumezkoen 17. edizioa eta gizonezkoen 129.a), eta 2023an gertatu zen bezala, Donostia Arraun Lagunak eta Urdaibai nagusitu dira. Lehenengo jardunaldia jokatu aurretik, hainbatek uste zuten Lugañene eta Bou Bizkaia faborito nagusiak zirela garaipena lortzeko; aurreko igandean izandako emaitzak ikusita, askok uste zuten biak zirela hautagai nagusiak, ia bakarrak, Kontxako Bandera irabazteko, eta bigarren jardunaldian iragarpenak bete dituzte, aurreko igandean erakutsitako nagusitasuna gaurkoan berretsita.
Horrenbestez, Arraun Lagunakek 3 Kontxako Bandera ditu jada (2021, 2023 eta 2024), eta Urdaibaik, berriz, 8 (2010, 2011, 2014, 2015, 2016, 2022, 2023 eta 2024). Aurtengo edizioan, bi ontziek errepikatu egin dute 2023an erdietsitako garaipena; Urdaibaik azken hiru ekitaldietan jarraian bereganatu du bandera Gipuzkoako hiriburuan.
Estropada amaitu ondoren, Aiora Belartieta Arraun Lagunakeko arraunlaria poz-pozik agertu da bere ontziak bigarren urtez jarraian Kontxako badian garaipena lortu duelako, baina ezin izan die malkoei eutsi, aste honetan bertan hil zaion amonarekin gogoratu baita, eta hari eskaini dio gaurko lorpena.
Antzeko zerbait gertatu zaio Urdaibaiko patroi Gorka Aranberriri, bere familiari eta emazteari eskaini ondoren. Zarauztarrak 9. Kontxako Bandera eskuratu du gaur, eta hiru klubekin lortu ditu guztiak: Urdaibai, Orio eta Santurtzi.
Ontzi irabazle bateko zein besteko kideak pozez lehertu dira 2024ko edizioko bandera eman dietenean. Honela jaso dute Lugañenekoek eurena:
Handik gutxira, Bou Bizkaia ontzikoen txanda izan da:
PATROIENTZAKO AGINDUAK:
Arraun munduan zaleek gutxi ezagutzen duten alderdietako bat entrenatzaileek estropadan zehar patroiei ematen dizkieten aginduak dira. Gaur horiek entzuteko aukera izan dugu EITBren emanaldian. Hurrengo bi bideo hauetan, Iker Zabalak eta Juan Mari Etxabek beren patroiei emandako agindu zein gomendioetako batzuk entzuteko parada dugu.
Juan Mari Etxabek Andrea Astudillori zuzendutako aginduak:
Iker Zabalak Gorka Aranberriri igorritako gomendioak:
OSPAKIZUNAK
Arraun Lagunaken ospakizunak berehala etorri dira; izan ere, Donostiako Konstituzio Plazan amaitu den kalejira bat egin dute, eta denboraldi honetan lortutako bandera guztiak astindu dituzte bertan.
