Faktoria
KOLDO TELLITU
Koldo Tellitu: "Eskola publikoaren aldeko jarrera nabarmena jasotzen du lege proposamenak"
Eider Aranberri | EITB Media
Ikastolen Elkarteko lehendakariaren arabera, hezkuntza akordioak "betebehar eta eskubide berdinak biltzen zituen ikastetxe guztientzat", baina lege proiektuan guztiz "kontrakoa" jasotzen da. Euskararen erabilerari dagokionez berriz, iritzi dio "termino juridiko zehatza" falta zaiola testuari.
-
Koldo Tellitu: "Eskola publikoaren aldeko jarrera nabarmena jasotzen du lege proposamenak"
6:49 min
Kritiko azaldu da Koldo Tellitu Ikastolen Elkarteko lehendakaria Euskadi Irratiko "Faktoria"n, Eusko Jaurlaritzaren Hezkuntza Sailak aurkeztu duen Hezkuntza Lege berriaren proposamenarekin. "Zalantzak sortu eta gabeziak ikusi" dizkio zirriborroari, eta "desadostasun sakonak" dituztela argi utzi du.
Hizkuntzari buruz, adibidez. Tellituren arabera, "ez da berariaz zehazten hizkuntza eredu berria". Ikasleek eta irakasleek zirriborroan zehazten diren hizkuntza maila horiek lortuko dituztela bermatzeko ez da bidea jasotzen. Euskararen erabilerari dagokionez berriz, iritzi dio "termino juridiko zehatza" falta zaiola testuari bermatzeko euskarazko ikastetxeetan hizkuntza behikularra izango dela. Horrez gainera, dimentsio unibertsala jaso beharko litzateke, "belaunaldiz belaunaldi" euskal kulturaren transmisioa bermatzeko.
Tellituk uste du betiko publiko-pribatu dikotomia berreskuratzen dela, publikoa bakarrik definituz eta "beste inongo alternatibarik gabe". Hezkuntza akordioak "betebehar eta eskubide berdinak biltzen zituen ikastetxe guztientzat", baina lege proiektuan guztiz "kontrakoa" jasotzen da. Nolanahi ere, etorkizuna baldintzatuko duen legea norabide egokian jartzeko "jarrera eraikitzailea" izango dutela argi utzi du Ikastolen Elkarteko lehendakariak, eta ekarpenak egingo dituztela ere esan du.
