Gizon bat erreskatatu dute Bilbon zaborra biltzeko kamioi baten barrutik

Bilboko suhiltzaileek gizon bat erreskatatu behar izan dute gaur Bilbon zaborra biltzeko kamioi baten barrualdetik, Udalak eitb.eus-i jakinarazi dionez.

Gertakaria Fernandez del Campo kalean jazo da, 08:15ean. Iturrion arabera, Bilboko erdigunetik papera eta kartoia biltzeko lanetan ari zen gidari batek edukiontzi batetik zerbait arraroa ikusi du jausten, kameren bidez. Pertsona bat izan zitekeela eta, badaezpada, papera prentsatzeko mekanismoa geldiarazi eta larrialdi zerbitzuak ohartarazi ditu.

Bilboko suhiltzaileek eskailera batekin atera behar izan dute gizona, ibilgailuok oso sakonak baita. Erreskatatutako gizona Basurtuko Ospitalera eraman dute, sabelaldean min baitzuen, baina onik dago.

Bilboko Udalak nabarmendu duenez, gidaria "erne" ibili da, eta horri esker atera da bizirik gizona.

Papera eta kartoia biltzeko edukiontziak blokeatuta daude horrelako gertakariak saihesteko. Hala, gizonak "konporta indarrez zabaldu behar izan du bertara sartzeko".

Intervención para rescate de persona atrapada dentro de camión de recogida de contenedores. C/ Fernández del Campo. Movilizadas dotaciones del Parque de Miribilla. #suhiltzaileak #Bilbao #bomberos ¿¿ pic.twitter.com/QjBWGwbsnu

— Bomberos Bilbao (@BomberosBilbao) 8 de agosto de 2018

Denbora gutxian gertatu den horrelako bigarren jazoera da honakoa. Uztailaren hasieran, beste pertsona bat atera behar izan zuten kamioi batetik, San Mames inguruan. Lo egiten sartu omen zen paper edukiontzi batean.