Herriak eta Hiriak
2018KO KARMENGO JAIAK
Emakumeei etxera laguntzeko doako zerbitzua jarriko du martxan Santurtziko Udalak
AGENTZIA | ERREDAKZIOA
Prebentziorako eta laguntzarako kideek eskainiko dute zerbitzua, orduero, 01:00etatik 06:00etara, Olatuen parkean kokatuta egongo den DYAko karpatik abiatuta.
Santurtziko Udalak emakumeei etxera laguntzeko doako zerbitzua eskainiko du Karmengo jaietan, uztailaren 13tik 22ra bitartean.
Udalak ohar bidez jakinarazi duenez, prebentziorako eta laguntzarako kideek eskainiko dute zerbitzua, udaltzainen gainbegirapean. Jaietako lehen asteburua igarotakoan, zerbitzuaren balorazioa egingo dute "jarraipena eman ala ez" erabakitzeko.
Aintzane Urkijo Santurtziko alkateak azaldu duenez, sexu-erasoak saihestea da ekimenaren helburua. Zerbitzua, orduero aterako da, 01:00etatik 06:00etara, Olatuen parkean kokatuta egongo den DYAko karpatik.
