EITB eta TOKIKOM berriro ere elkarlanean mugikortasuna aztergai duen Saretzen proiektuaren seigarren alean

Hego Euskal Herriko bizilagunen mugikortasuna izango du aztergai Saretzen proiektuaren seigarren aleak, datu-kazetaritza lantzeko EITBk eta TOKIKOMek elkarlanari esker ondutako ekimenak. Ostegun honetan, martxoak 27, kaleratuko dute azterlana, 06:00etatik aurrera.

Zenbat joan-etorri egiten dira egunero gurean? Zenbat egiten ditu bizilagun bakoitzak? Garai batean baino gehiago ala gutxiago? Aldea al dago lurralde historikoen artean? Nondik nora egiten dira? Zenbat egiten da oinez? Eta, ibilgailuz? Nolakoa da garraio publikoaren erabilera EAEn? Eta Nafarroan? Galdera horiei guztiei erantzungo die ikerketak, eta, besteak beste, matrikulazio datuak emango dituzte.

2022an jarri zuten abian EITBk eta TOKIKOM tokiko komunikabideen sareak Saretzen proiektua, elkarrekin datu kazetaritza jorratu eta datuok modu bateratuan kudeatu eta ustiatzeko. Lehen argitalpenean, Hego Euskal Herriko demografia-datuak landu zituzten EITBko zein TOKIKOMeko hedabideek, nork bere esparruari, ezaugarriei eta eremuari egokituta. Ondoren, immigrazioaren, banku-sukurtsalen, maskoten eta etxebizitzen datu-analisia egin dute.

Hain zuzen ere, Hego Euskal Herriko esparru komunikatiboa garatzea eta trinkotzea da EITBren eta TOKIKOMen aliantzaren xedea, biztanleen informazio beharrizanak asetzeko. Euskaraz sortutako kalitatezko eduki lehiakorrekin Euskal Herriko agendan eragitea ere badu helburu.