Teknologia -
Internet
Googlek bere bilatzailea moldatuko du, 'clickbait' edukia beheko postuetara bazter dezan
Ranking berriak saihestu egingo du posizio nagusietan erakustea "bilaketa-motorretan sailkapen ona lortzeko berariaz sortuak dirudien edukiak", bilaketetan eduki originalak eta kalitatezkoak errazago aurkitzeko.
Agencias | EITB Media
Googlek iragarri du aldaketak egingo dituela bilatzailean, erabiltzailearentzat garrantzitsuak, informatiboak eta erabilgarriak diren edukiak lehenesteko, klikak erakartzeko estrategia jarraituz sortutako edukien gainetik.
Konpainia teknologikoak aldatu egingo du bilatzailean erabiltzailearentzat garrantzitsuak diren edukien rankinga, bilaketa bat hasten denean erabiltzaileari lagun diezaiokeen informazioa nabarmentzeko.
Zehazki, ranking berriak saihestu egingo du originalak eta kalitatezkoak ez diren edukiak posizio nagusietan erakustea, bestela esanda 'clickbait' deituriko eta "nagusiki bilaketa-motorretan sailkapen ona lortzeko sortu" direla diruditenak, konpainiak bere blogean adierazi bezala.
Aldaketa hori, lehenik eta behin, mundu osoko ingelesezko erabiltzaileentzat ezarriko da datorren astean. Konpainiak ranking horrekin batera eguneratze bat egingo du, erosketa-bilaketetan aipamen originalak eta kalitatezkoak aurkitzeko.