Politika -
Batzar Nagusia
Podemosekin akordioak adosteko beharra berretsi du Sumarrek
"Aldez aurreko baldintzarik gabe, denen nortasunen pluraltasuna errespetatuz eta autonomia politikoa bermatuz" egin behar dituzte akordioak 2023ko uztailaren 23tik koalizioa osatzen duten alderdiek, Sumarren iritziz.
AGENTZIAK | EITB MEDIA
Sumarrek sei ebazpen proposamen onartu ditu larunbat honetan bere batzar nagusian. Horietako bat da 2023ko uztailaren 23an gobernu koalizioa osatu zuten alderdi guztiekin akordioak adosteko beharra, baita Podemosekin ere.
Sumarreko Antolakuntza idazkari Lara Hernandezek komunikabideen aurrean esan duenez, aho batez adostu dituzte sei proposamenak, eta horien bidez gai zehatz batzuen inguruan alderdiak duen jarrera zehaztu du Sumarrek.
"Bat-egite politikan aurrera egiten jarraitzea berretsi dugu, gure alderdiaren nortasunaren ikur baita. Lanean jarraituko dugu, akordioak adostu beharrean gauden alderdiekin akordioak lortu ahal izateko", adierazi du.
Aliantzekin lotuta onartutako ebazpenean, Sumarrek defendatu du hurrengo hauteskunde zikloaren estrategia dela "aniztasuna batzea, ezberdintasunak elkartzea eta akordioak adostea".
Zentzu horretan, nabarmendu du "aldez aurreko baldintzarik gabe denen nortasunen pluraltasuna errespetatuz eta autonomia politikoa bermatuz" egin behar dituztela akordioak 2023ko uztailaren 23tik koalizioa osatzen duten alderdiek.
Yolanda Diazen alderdiak, bestalde, azpimarratu du egungo agertoki politikoak "irudimena, ausardia, elkarrizketarako gaitasuna eta akordioa" eskatzen dituela.