Politika -
AUTOGOBERNUA
Tituluen homologazioari buruzko epaiak agerian utzi du burujabetza gehiagoren beharra, EH Bilduren arabera
Koalizio subiranistak "positibotzat" jo du Auzitegi Konstituzionalera jotzeko Eusko Jaurlaritzaren erabakia, eta herri gisa jokatzeko deia egin die euskal indar politikoei, "autogobernuaren aurkako eraso berri" honen aurrean.
EITB Media
Atzerriko unibertsitate-tituluen homologazioa Euskadira transferitzea baliogabetzeko Auzitegi Gorenak hartutako erabakiaren ostean, agerian gelditu da burujabetza gehiagoren beharra, EH Bilduren arabera.
Koalizio subiranistak "positibotzat" jo du Eusko Jaurlaritzak Auzitegi Konstituzionalera jotzeko hartu duen erabakia, eta euskal indar politikoei dei egin die "elkarrekin" eta "herri ikuspegiarekin" jokatzeko.
"Egoera honek agerian uzten du estatus politiko berri baten beharra, hemen oinarrizko gaien inguruan erabaki ahal izateko eta Estatuarekin berdinen arteko harremana ezartzeko, gure eskubideen benetako berme eta errespetua eman dadin", gaineratu du.
Hedabideetara zabaldutako ohar batean, kezka agertu du, euren tituluak homologatu arte "ziurgabetasun egoeran" dauden 200 pertsonengatik. "Jaurlaritzak aurkeztutako helegiteak haien egoera modu egokian konpontzea espero dugu", azpimarratu du.
EH Bilduren iritziz, atzerriko unibertsitate-tituluen homologazioa "funtsezkoa" da beste herrialde batzuetatik iristen diren pertsonak lan munduan sartzeko, eta horiek nabarmen lagun dezakete "gure herriaren garapen ekonomikoan".