Tramitera onartu dituzte Mugica eta Letamendiren kasuekin lotuta Giza Eskubideen Behatokiak jarritako kereilak

Josu Mugicaren eta Txomin Letamendiren kasuekin lotuta Euskal Herriko Giza Eskubideen Behatokiak aurkeztutako lehenengo bi kereilak tramitera onartu dituzte Madrilgo 12. Epaitegiak eta Donostiako 5.ak.

"Josu Múgica Ayestaran 1975eko uztailaren 30ean hil zen, Madrilen, polizia-tiroen ondorioz. Operazio horretan, egiaztatuta geratu zen Mikel Lejarza agente infiltratuak, Defentsako Goi Mailako Ikasketa Estrategikoen Zentroko kideak, parte hartu zuela, ETAko kideen aurrean 'Gorka' eta Espainiako Zerbitzu Sekretuetako kideen aurrean 'El Lobo' ezizenarekin", salatu dute.

"Txomin Letamendi Murua, berriz, Madrilen hil zen 1950eko abenduaren 20an, Polizia frankistak egin zizkion tortura fisiko eta psikiko larrien ondorioz, bai eta jasan zituen espetxe baldintza penagarrien ondorioz ere", azaldu dute.

Horregatik, iritzi diote onarpen horiek, "salbuespenezkoak badira ere", egungo bunker judiziala pitzatzen hasi direla, eta "gure tesia berresten dugu, hau da, egitate horiek zalantzarik gabe gizateriaren aurkako krimenak direla, eta, beraz, preskribaezinak eta amnistiaezinak, Nazioarteko Zuzenbideaz gain, Memoria Demokratikoari buruzko 20/2022 Legeak jasotzen duen bezala".

Hain zuzen ere, Espainiako epaileen artean gehiengoa den egoera hori aldatzen saiatzeko, 2024ko maiatzean bigarren bide bat ireki zuen Eskubideen Behatokiak, kasu honetan NBEren aurrean.