Eusko Jaurlaritzak aurrekontu akordiorako proposamen berria egingo dio gaur oposizioari

Noel d 'Anjou Ogasun sailburuak proposamen berri bat helaraziko die gaur oposizioko talde politikoei, 2025erako Euskal Autonomia Erkidegoko aurrekontu proiektuaren inguruan akordio bat lortzeko saiakeran. Bertan, EH Bilduk, PPk eta Sumarrek planteatutako neurri batzuk jasoko dira, Maria Ubarretxena Eusko Jaurlaritzako bozeramaileak astelehenean jakinarazi zuenez.

Ubarretxenak adierazi zuen helburua aurrekontuen inguruan akordio "zabalagoa" ixtea dela, EAJk eta PSE-EEk osatzen duten gehiengo absolutuari esker Eusko Legebiltzarrean onartzea bermatuta badute ere.

Bozeramaileak azaldu zuenez, d 'Anjouk proposamen berri bat aurkeztuko die taldeei gaur hasiko den bigarren bilera sortan. Proposamen horrek --gaineratu zuen-- oposiziotik planteatu zaizkien neurriak "aintzat" hartuko ditu, proposamen horietako batzuk sailburuak aurkeztuko duen dokumentuan "jasota" baitaude.

"Badakigu gehiengo osoa dugula, baina Gobernua zintzoki saiatzen ari da akordio zabalagoa lortzen, borondate politikoarekin", adierazi zuen.

Ubarretxenak "erantzukizun politikoz" eta "Euskadiren interes orokorraren" arabera jokatzeko deia egin zion oposizioari. "Herriak behar du", gaineratu zuen.

Bestalde, Nerea Kortajarena EH Bilduren Eusko Legebiltzarreko bozeramaileak atzo ohartarazi zuen aurrekontuen negoziazioa ez dela "Excel taula bat orekatzea", eta Jaurlaritzak bere alderdiarekin "akordio politikoa" itxi nahi badu, "landu" egin behar dela. RNEri eskainitako elkarrizketa batean, Kortajarenak adierazi zuen asteazken honetan "marra gorririk" eta "aurreiritzirik gabe" joango direla batzarrera.

Kortajarenaren ustez, "nekez uler daiteke" Jaurlaritzak ez ulertzea egungo "etxebizitza krisia" eragin duten politikak aldatu behar direla.

"Etxebizitzarekin dugun arazoaren dimentsioa ikusita, eta horrek gazteenen emantzipazio zailtasunak dakartzala ikusita, ezin dugu gauzak modu berean egiten jarraitu", azpimarratu zuen.

Koalizioko ordezkariaren ahotan, EAJk eta PSE-EEk adostutako fiskalitate proposamena ez da "erreforma fiskala", "ukitu batzuk" baizik. Kortajarena bera, Pello Otxandiano eta Oihana Etxebarrieta d 'Anjourekin batzartuko dira 11:30ean.

Azkenik, Sumarrek proposamen bat helarazi dio Eusko Jaurlaritzari aurrekontuekiko babesa negoziatzeko 755,5 milioiko neurriekin, hala nola 2.000 pisu sozial berri sortzea (107 milioi), Osakidetza "erreskatatzea" (250 milioi) eta oinarrizko errenta unibertsaleko egitasmo pilotu bat (80 milioi).

Jon Hernandez Sumarreko legebiltzarkidea eta Alba Garcia, indar politiko horrek EAEn duen burua, 09:00etan bilduko dira sailburuarekin. Ondoren, Laura Garrido eta Alvaro Gotxi PPko ordezkarien txanda izango da, 10:00etan. Bilera-sortaren amaieran, Ogasun sailburuak agerraldi bat egingo du 13:30ak aldera.