Pradalesek Makroeskualde Atlantikoa eta euskararen ofizialtasuna defendatuko ditu Europara egindako bidaian

Imanol Pradales lehendakaria Luxenburgora eta Bruselara joango da gaur-biharretan, Europar Batasuneko instituzioen aurrean Makroalde Atlantikoaren sorrera eta euskararen ofizialtasuna defendatzeko, besteak beste. Pradalesek nazioartean lehendakari gisa egingo duen lehen bidaia ofiziala izango da.

Lehendakariaren agenda ofizialaren arabera, asteartean Pradales lehendakaria Nadia Calviño Europako Inbertsio Bankuko presidentearekin elkartuko da Luxenburgon, eta, ondoren, Belgikako euskal komunitatearekin bilduko da Bruselan.

Asteazkenean, European Policy Centreko arduradunekin batzartuko da lehenik, eta, segidan, Oihana Agirregoitia (EAJ), Idoia Mendia (PSE-EE) eta Javier Zarzalejos (PP) eurodiputatuekin bilera egingo du.

Bigarren egun horretarako ere hitzordua egina du Roberta Metsola Europako Parlamentuko presidentearekin eta Younous Omarjee presidenteordearekin, Fernando Clavijo Kanarietako presidentearekin eta Salvador Illa Kataluniako Generalitateko presidentearekin.

Etxera itzuli aurretik Bruselan egingo du azken geldialdia Pradales lehendakariak eta "Power Regions of European Summit" foroan parte hartuko du —70 eskualdetako ordezkariekin batera— eskualdeek industria sektorearen kudeaketan duten papera handitzeko neurriak eskatzeko.

Bi eguneko bidaia ofizial honetan, Pradales lehendakariak alboan izango ditu Ander Caballero Europar Batasuneko eta Kanpo Harremanetako idazkari nagusia, Ion Muñoa Trantsizio Sozialaren eta 2030 Agendaren idazkari nagusia, Marta Marin Euskadiren Europar Batasuneko ordezkaria, eta Mikel Anton Europar Batasunerako zuzendariak.