Zerga erreformaren auzian Podemosen jarrera salatu du EAJk: "Tentazioa izan lezake boz berriak bultzatzeko"

Aitor Esteban EAJk Diputatuen Kongresuan duen eledunak "oso zail" ikusten du gaur Behe Ganberan zerga erreformaren harira dagoen bozketa. Inbestidura blokearen alderdi guztien babesa behar du Pedro Sanchezen gobernuak neurri fiskalak aurrera ateratzeko, eta beraz, "ezinezkoa da jakitea zer gertatuko den". Aurreikusi duenez, arratsaldeko lehen ordura arte egongo dira negoziatzen. 

Ingurumari horretan, Podemos "oso faktore garrantzitsua" dela uste du, eta bere jarrera salatu du. Izan ere, azaldu du inkestetan Jone Belarraren taldea Sumarren aldetik azaldu dela boto asmoan, eta baliteke horregatik "tentazioa" izatea "hauteskunde berriak bultzatzeko". 

Euskadi Irratiko "Faktoria" saioan egin dioten elkarrizketa batean, Esteban kritiko azaldu da ezkerreko gainerako taldeekin ere (ERC eta EH Bildu): "Eurena eta nahi duten legez hor egotea nahi dute, eta hori ezinezkoa da". Hala, "gutxieneko bat" adosteko dei egin die. 

PPk har lezakeen jarreraz galdetuta, uste du "pozoidun karamelua" eman diola PSOEri, Europako zerga adosteko babesa bai, baina ez du argi gobernuak hainbat diru-sarrera bermatzeko sozialistek aurkeztutako zuzenketen alde bozkatuko duen. 

Horrenbestez, zergen inguruko auzia argitzeke dagoela, Estebanek "ziurtzat" jo du Espainiako Gobernua aurreko aurrekontuak luzatuta moldatu beharko dela 2025eko lehen txanpan behintzat.