Sumarrek ez dio osasun itunari lerro gorririk jarriko, baina ohartarazi du adostasuna "urrun" dagoela

Jon Hernandez Sumarreko legebiltzarkideak adierazi duenez, bere alderdiak ez dio osasun itunari "lerro gorririk" jarriko, baina gaineratu du ez dutela onartuko elkarrizketa horiek Eusko Jaurlaritzak "propagandarako" erabiltzea. "Inork ezin du erabili oraindik oso urrun dauden itunak saltzeko", azpimarratu du.

Osasun itunaren inguruko hurrengo bilera asteazkenean egingo dute Donostian. Horren harira, bere alderdiak defendatuko dituen ikuspegiak azaldu ditu Hernandezek komunikabideen aurrean egindako agerraldian, eta Imanol Pradalesen Gobernuak erakutsitako "gehiegizko baikortasuna" kritikatu du, "bilera horretatik zeozer aterako den oraindik ez dakitenean".

"Oraindik ez daude itun baterako oinarririk. Inork ez dezala erabili oraindik existitzen ez diren itunak edo adostasunak saltzeko", esan du.

Bilera horretan, Osakidetzaren egoeraren gaineko diagnostiko propioa defendatuko du Sumarrek, eta zazpi proposamen mahairatuko ditu. "Ez dugu lerro gorririk, ez baita izango azoka negoziazio bat", akordioa lantzeko komuneko puntu batzuk adostea baizik.