Ministerioak Etxebizitza Legea aplikatzen duten erkidegoak sarituko ditu, baina ez ditu besteak zigortuko

Etxebizitza eta Hiri Agenda Ministerioak Etxebizitzaren Legea ezarri eta tentsio handiko guneak ezarriko dituzten erkidego autonomoak sarituko ditu, ekintza konkretuak garatu ditzaten diru gehiago esleituta. Modu honetara, Etxebizitzaren Legearen 18. artikuluak dioena beteko du, eta legea beteko ez duten erkidegoak zigortzeko aukera urruntzen du.

Ostegunean egin den Etxebizitzaren Konferentzia Sektoriala hasi aurretik eman dute erabakiaren berri Ministerioko iturriek. Isabel Rodriguez ministroak eta erkidegoetako sailburuek hainbat gai izan dituzte hizpide batzar honetan: Alokairurako Gazteentzako Bonoaren deialdi berria, Etxebizitzaren Estatuko plan berria eta Berreskuratze-, eraldatze- eta erresilientzia-planaren baitako funtsen bidez erkidegoek hartuko dituzten neurriak noraino garatu diren.

Ministerioaren helburua ez da Etxebizitza Legea aplikatzen ez duten erkidegoei funts gutxiago esleitzea. Kontrara, legea ezartzen dutenak eta tentsio handiko guneak ezartzen dituztenak aparteko funtsekin sarituko dituzte, duela urte eta erdi baino gehiago onartu zen legean jasotzen den bezala.

Etxebizitzaren Konferentzia hasi aurretik, Isabel Rodriguezek tentsio handiko guneak ez izendatu nahi izatea kritikatu du. "Lege honek aukera ematen du prezioak % 5 jaisteko, familiei eta gazteei mesede eginez, eta jabeek % 90erainoko hobariak izan ditzaten. Zergatik ez dugu egiten? Ez dut ulertzen", adierazi du.