Iriartek uste du erabakitzeko eskubideaz EAJrekin Gipuzkoan lortutako ituna "neutralizatuko" duela PSE-EEk

Maddalen Iriarte EH Bilduk Gipuzkoako Batzar Nagusietan duen bozeramaileak nabarmendu duenez, erabakitzeko eskubideari buruz EAJrekin Gipuzkoan lortutako akordioa "neutralizatuko" du PSE-EEk, koalizio bazkideek "bi gobernu baleude bezala" funtzionatzen dutelako, hainbat gaitan "batak bestea neutralizatuta". Ondorioz, "puntu hil batean geratzen gara", kritikatu du. 

Euskadi Irratiko "Faktoria" saioan elkarrizketatu dute gaur Iriarte, asteon Batzar Nagusietan Politika Orokorreko amaitu berritan. Jeltzaleek Estatus berriak izan beharko lituzkeenak adostea "erraza" izan dela aitortu du Iriartek, 2018tik jasota baitaude oinarriak —Eusko Legebiltzarrean horren inguruko adierazpena itundu zuten EH Bilduk eta EAJk— eta nazio aitortza eta erabakitzeko eskubidea, biak beharrezkoak direla gogorarazi du. Iriarteren esanetan, planteamendu hori aurrera ateratzeko "gehiengoak badaude Bizkaiko eta Arabako Batzar Nagusietan, Legebiltzarrean eta esango nuke, udal gehienetan".

Hori horrela, erakundeotan zentzu bereko adierazpenak ez onartzea "oso grabea" irudituko litzaiokeela azpimarratu du: "Inork ez du ulertuko, gero esaten dute politikarekiko desafekzioa dagoela (...) Zer da jokoan dagoena? Eserleku batzuk? Bada eserleku batzuengatik herri honek ez du aurrera egingo", salatu du. 

Zerga sistemaren erreforma ere hizpide izan du Iriartek, eta hor ere zentzu berean mintzatu da. Horren ustez, "orain tokatzen dena da" Gipuzkoako Batzar Nagusietako lantaldean lortutako akordio politikoa (txostena onartu dute EH Bilduren oniritziarekin) "testu batera eramatea", eta Arabarekin eta Bizkaiarekin "armonizazioa" eginda, foru araua onartzea. Helburua, nabarmendu duenez, "herritarrek behar duten zerga sistema justu eta progresiboa" ezartzea da. Ildo horretan, erreforma horretan etxebizitza erosteagatik orain eramaten diren kenkariak "berraztertzearen" alde agertu da. "Oso erosleak izan gara, beste kultura bat sortu behar da horren kontura", azaldu du. 

Azkenik, AHTak Nafarroarekin lotura nondik egin behar den galdetuta, EH Bilduko bozeramaileak esan du azpiegitura horren inguruko kudeaketaz hausnarketa egin behar dela: "Izugarrizko akatsa izan da", eta "milioiak gastatu ondoren", Ezkio-Itsason "estazio fantasma" bat geratu ahal dela ohartarazi du.