Politika -
EGIAZKO INFORMAZIOAREN BABESA
Ministroen Kontseiluak astearte honetan onartuko du gezurren kontrako Erregenerazio Plana
Hedabideen gardentasuna, independentzia eta aniztasuna bermatzen lagunduko duten hainbat neurri jasoko dituzte, herritarrek egiazko informazioa jaso dezatela bermatzeko.
AGENTZIAK EITB MEDIA
Espainiako Ministro Kontseiluak astearte honetan onartuko du uda garaian Pedro Sanchez presidenteak iragarri zuen Demokrazioaren alde eta gezurren kontrako Ekintza Plana. PPren babesa ere izatea espero du Sanchezek.
Talde parlamentario guztiekin "hedabideen gardentasuna, independentzia eta aniztasuna" bermatzen lagunduko duten hainbat neurri adostu nahi ditu Gobernuak, herritarrei "egiazko informazioa" heltzen zaiela bermatzeko.
Atzo egin zuen hitzorduaren iragarpena Sanchezek diputatu eta senatari sozialistekin Kongresuan, ikasturte politikoari hasiera emateko egindako topaketan.
Espainiako presidenteak nabarmendu zuenez, plan hau Konstituziotik "eratorria" da, "herritarrek egiazko infomazioa jasotzeko duten eskubidea defendatzen baitu", eta Europako Batzordeak zein Europako Parlamentuak helburu horrekin hartutako erabakien baitan kokatzen da. Horregatik, "demokrata guztien babesa" izatea espero duela esan zuen.
"Ez litzateke ulergarria izango Estrasburgon gauza batzuk onartzea eta gero hemen, Diputatuen Kongresuan, gauza beraren kontrako botoa ematea", adierazi zuen PPri erreferentzia zuzena eginez.
Plan honen helburua Gorte Nagusiei eta "ekosistema informatiboari" "gardentasun, aniztasun eta berme gehiago ematea" da, "desinformazioari" aurre egiteko eta demokrazia erasaten ari den "lokatzaren kultura" geldiarazteko.