Euskal diasporak iraganean, orainean eta etorkizunean izan duen funtsezko zeregina nabarmendu du Pradalesek

Euskal diasporak Euskadiri egindako "ezinbesteko ekarpena eta funtsezko zeregina" azpimarratu ditu igande honetan Oñatin Imanol Pradales lehendakariak, eta Euskadi "herri migratzailea" dela azpimarratzeaz gain, "harrera egin behar duen herria" dela esan du.

Oñatin esan ditu hitzok lehendakariak, Eusko Jaurlaritzak antolatutako Euskal Diasporaren Nazioarteko 7. Egunean, hain zuzen ere.  

Ekitaldian izan dira, halaber, Maria Ubarretxena Jaurlaritzaren bozeramailea, Mikel Jauregi Industria sailburua, Ignacio Pérez Zientzia, Unibertsitate eta Berrikuntza sailburua, Izaro Elorza Oñatiko alkatea, Ander Caballero Europar Batasuneko eta Kanpo Harremanetako idazkari nagusia eta Gorka Álvarez Kanpoan dagoen Euskal Komunitatearentzako zuzendaria.

Aurten Oñati aukeratu dute ospakizun honetarako, 1974an Boiseko (Idaho, AEB) Estatu Unibertsitateko ikasle eta irakasleen lehen egonaldi programaren 50. urteurrena delako.

Ekitaldi nagusia Larraña auzoko Eltzia eraikinean egin da, eta lehendakariak adierazi duenez, "gaurkoa pozik egoteko eguna da; izan ere, duela 50 urte azaldu zen hemen, Oñatin, 90 lagunez osatutako talde bat. Pat Bieter irakasle boisetarrak bultzatutako euskaldunen talde bat. Helburua aberrira itzultzea zen, kulturaz gozatu eta euskara ikastea. Eta hala egin zuten".

Pradalesek nabarmendu du egun hau "euskaldunentzako festa berezia" dela eta "esanahiz beteta" dagoela, eta 15 herrialdetan 100 ekitaldi baino gehiago antolatu direla jakinarazi du, ospakizuna diasporan "errotzen" ari den erakusgarri. 

Lehendakariak beste herrialde batzuetara joan behar izan zuten euskaldunen historia oroitu du, eta kontatu du berak nola izan zuen lehendabizikoz diasporarekin harremana, Miguel Mariren istorioa ezagutu zuenean, Mexikora bizitzera joan zen gazte batena. Orduan ohartu zen, bere hitzetan, Euskadi "herrialde migratzailea" ere badela. 

Pradalesek euskal diasporaren "ezinbesteko ekarpena" azpimarratu du. "Milaka eta milaka euskaldun, han eta hemen, munduko bazter guztietan. Euren ekarpenari esker, gure hizkuntza eta kultura nazioarteko dimentsio berri batera eraman ditugu elkarrekin. Eta orain, aldaketa garai honetan, elkarrekin imajinatu behar dugu gure harreman berria, diaspora berriarekin dugun harremana", gaineratu du.

Euskadi globala

Lehendakariak, inbestidura-saioan esandak hitzak gogora ekarriz, azaldu du Euskadik "asko duela jokoan nazioarteko testuinguruan datozen urteetan". "Bidegurutze baten aurrean gaude, eta bidea aukeratu behar dugu", gaineratu du.

"Sare berriak" ehundu beharraz aritu da Pradales eta balioa emango dioten "nodoekin konektatu" behar dela Euskadi, bai giza balioa, bai balio kulturala, ekonomikoa, zientifikoa eta industriala. "Estrategia globala eta nazioartekoa, euskaldunok berriro ere itsaso eta mundu berriak zeharka ditzagun, gure herriarentzat oparotasuna bilatze aldera. Euskadi global batez ari naiz", adierazi du. Horretarako, "funtsezkoa da euskal diasporaren eta diaspora osatzen duten pertsonen papera; izan ere, atzo bezala, gaur ere enbaxadorerik onenak zarete".

Imanol Pradalesek adierazi duenez, euskal diaspora "ez da argazki finko" bat, urtero ehunka euskal herritar ateratzen baitira atzerrira formakuntza Euskadin eginda. Adierazi duenez, horretarako arrazoi ezberdinak dituzte: "esperientzia berriak bizitzea, ikasketak osatzea edo etorkizun hobea lantzea".

"Ez dugu ahaztu behar pertsona horiek ere gure kanpoko sarearen parte direla. Ezinbesteko eragile zarete gure aurrerabiderako, zentzu guztietan. Gure radarrean eduki behar zaituztegu eta etxera itzuli nahi duzuenontzako bideak eskaini behar dizkizuegu", adierazi du.

Harrera egin behar duen herria

Larraña Etxetik oso gertu zeudela azaldu du Pradalesek, harrera-zentro "garrantzitsua" izana, "aspaldikoak ez diren garaietako errealitatea gogorarazten duen lekua". "Euskal Herria ongi hartua izan da eta da oraindik ere. Horregatik, guk ere harrera-herri izan behar dugu", adierazi du.

"Erronka berriek rol berriak eskatzen dituzte, eta ziur nago euskal diasporak ezinbesteko ekarpena egiten jarraituko duela. Izan zirelako gara, eta, garelako, izango dira", amaitu du.