Politika -
Katalunia
Sanchez Aragonesekin bilduko da asteazken honetan, Illa presidente izendatzeko negoziazio betean
Hitzordua Bartzelonan dute bi buruzagiek. ERCk bi asteko epean lortu nahi du Kataluniako subiranotasun fiskalerantz aurrera egingo duen akordioa.
EITB MEDIA
Pedro Sanchez Espainiako Gobernuko presidentea Pere Aragones Kataluniako presidentearekin bilduko da asteazken honetan Bartzelonan, ERC eta PSC Salvador Illaren balizko inbestidura negoziaziatzen ari diren honetan.
ERCk uztailaren amaiera ezarri du aurreakordioa lortzeko muga gisa eta bi buruzagien arteko hitzordua ERCren taldeak sozialistei euren botoak lortzeko 'ultimatuma' egin eta biharamunean iritsi da: izan ere, Marta Rovirak, Josep Maria Jovée, Marta Vilaltak, Juli Fernandezek eta Oriol Lopezek astelehen honetan La Vanguardian argitaratutako artikulu batean adierazi dutenez, "subiranotasun fiskalerako aurrerapauso garrantzitsu eta erabakigarririk gabe, ez da inbestidurarako akordiorik egongo".
Hala, ERCren ohartarazpenaren ondotik eta Illaren inbestiduran erraztu asmoz, Espainiako Gobernuak atzo iragarri zuen "azpifinantzaketa" zuzenduko duela datozen hiru urteetan, eta 1.520 milioi Kataluniara transferituko dituela: horietatik 1.058 Rodaliesekin lotuta egongo da, eta 450 I+Grako.
Partida horiek PSOEren eta ERCren arteko 2023ko azaroko itunaren parte dira, eta Salvador Illaren inbestidurarako negoziazio betean formalizatu dira.
