Politika -
Bizkaia
Josu Erkoreka Bizkaiko Foru Aldundiko aholkulari izendatu dute
Urkulluren Gobernuko lehendakariorde eta Segurtasun sailburu izandakoa Elixabete Etxanobe ahaldun nagusiaren kabinetean sartuko da aholkularitza lanak egiteko.
EITB Media
Bizkaiko Foru Aldundiko Gobernu Kontseiluak Josu Erkoreka (1960, Bermeo) aholkulari izendatu du. Amaitu den legegintzaldian Jaurlaritzako lehendakariorde eta Segurtasun sailburu izandakoa Bizkaiko Diputatu Nagusi Elixabete Etxanoberen kabinetean sartuko da orain, foru aholkulari gisa.
Aldundiko iturriek adierazi dutenez, izendapen hori Erkorekaren "esperientzia egiaztatuak eta curriculum pertsonalak" eragin dute. Haien aburuz, "Bizkaiko Aldundian ekarpen handia egin dezaketen ezagutza juridikoak" ditu EAJko politikariak.
Horrez gainera, zehaztu dute barne lana egingo duela, aholkularitzakoa eta proiekzio publikorik gabea.
Deustuko Unibertsitateko Zuzenbide irakaslea izandakoa, Eusko Jaurlaritzako sailburu izan da Iñigo Urkulluren hiru legegintzaldietan eta, aurretik, EAJren diputatua eta bozeramailea izan zen Kongresuan.