Auzitegi Gorenak Delgadoren izendapena baliogabetu du Memoria Demokratikoko fiskal gisa

Giza Eskubideen eta Memoria Demokratikoaren Fiskaltzako salako fiskal gisa Dolores Delgadoren izendapena baliogabetzea erabaki du astearte honetan Auzitegi Gorenak, gehiengoz, eta Kontseilu Fiskalaren esku utzi du, Baltasar Garzon epaile ohiaren bikotekidea izanik, kargua hartzearekin bateragarria den ala ez erabakitzea.

Erabaki hori hartu du Fiskalen Elkarteak, Fiskalen Elkarte Profesional eta Independenteak eta Luis Ibañez drogaren aurkako fiskalak (kargurako hautagaia) jarritako errekurtsoak baietsita.

Hala jakinarazi du auzitegiak, eta datozen egunetan plazaratuko ditu erabakiaren arrazoiak. Delgadoren izendapen bat baliogabetzen duen Gorenaren bigarren ebazpena da; izan ere, joan den azaroan baliogabetu egin zuen Auzitegi Goreneko fiskal togadunaren izendapena.

Auzitegiak zehaztu duenez, oraingoan magistratuek baliogabetu egin dute Delgado izendatzeko Errege Dekretua, eta jarduketak atzera eramateko agindu dute, Fiskaltzaren kontsulta organoak erabaki dezan karguaren bateragarritasunei buruzko Fiskaltzaren Estatutu Organikoaren 58.1 artikuluan aurreikusitako debekua dagoen ala ez.

Hori horrela, auzitegiak onartu egin ditu bi elkarteen eta drogaren aurkako fiskalaren eskaerak, izendapen hori bertan behera uzteko eta jarduketak Delgado izendatu aurreko unera eramateko eskatzen zutenak.