Politika -
Justizia
BJKN berritzeko "mekanismo berriak" bilatuko ditu Espainiako Gobernuak, PPren blokeoak jarraitzen badu
Justiziaren gobernu-organoak bost urte daramatza jardunean eta agintaldia iraungita. Espainiako Gobernuak Botere Judizialaren Kontseilu Nagusia berritzeko eskatzen diren gehiengo parlamentarioak murriztea proposatu zuen 2020an, baina erreforma bertan behera utzi zuen Bruselaren abisuen aurrean.
Agentziak | EITB Media
Pilar Alegria Espainiako Gobernuko bozeramaileak gaur adierazi duenez, Botere Judizialaren Kontseilu Nagusia (BJKN) berritzea Exekutiboaren ardura da, bost urtez jardunean egon eta gero. Horregatik, PPren blokeoak bere horretan jarraitzen baldin badu, "mekanismo berriak" bilatuko dituztela ohartarazi du Alegriak.
Ministroen Kontseiluaren ostean emandako prentsaurrekoan, Alegriak ez du baieztatu nahi izan Espainiako Gobernuak 2020an proposatu zuen erreformari berriro helduko ote dioten, Botere Judizialaren Kontseilu Nagusia berritzeko eskatzen diren gehiengo parlamentarioak murrizteko.
"Oraindik ere PPrekin akordio hori desiragarria da, baina Alderdi Popularrak berrikuntza blokeatzeko eta Konstituzioa ez betetzeko erabateko ahalegina egiten badu, mekanismo berriak aztertu eta baloratu behar ditugula ulertu beharko dute", adierazi du.
PPrekin akordioa ixteko apustua eginda, nahiago izan du gehiengoak jaisteko "bigarren aukera" hori ez aipatzea, baina berretsi du: "Gobernu honen ardura Botere Judizialaren Kontseilu Nagusia berritzea da, eta hala egingo dugu".
Legeak une honetan eskatzen du Botere Judizialaren Kontseilu Nagusiko kideak aukeratzeko Parlamentuaren hiru bostenek hautatzea, eta, beraz, ezinbestekoa da PPrekin akordioa ixtea.
Sozialistek eta Podemosek bere garaian proposatu zuten bigarren itzulian gehiengo absolutua nahikoa izatea, eta proposamen hori gaur erregistratu du berriro alderdi moreak Kongresuan, eta begi onez ikusten du Sumarrek, Gobernu koalizioko egungo kideak.
Moncloako prentsa aretotik, Yolanda Diaz Espainiako Gobernuko bigarren presidenteordeak adierazi du "akordioen eta elkarrizketaren jarraitzaile sutsua" dela, baina gogorarazi du oso ondo ezagutzen duela Alberto Nuñez Feijoo PPko presidentea, eta "oso argi" du hark ez duela BJKN berritzeko borondaterik.
"Alderdi Popularra akordio bat lortzeko prest dagoela sumatuko banu, bere herriaren onerako, noski, ez nintzateke mahai horretatik altxatuko; baina argi daukat Alderdi Popularraren asmoa gure herriko erakundeak txikitzea dela, besteak beste, epaileen organo exekutiboa kontrolatu behar duelako", ziurtatu du.