Entitate txikiari buruzko kontsulta egiten ari dira Igeldon

Igeldon (Donostia), tokiko entitate txiki gisa eratzeari buruzko herri galdeketa egiten ari dira gaur, Itsas Aurre kultur etxean.

Galdeketaren bezperan, Donostiako alkate Eneko Goiak aurreratu du astelehenetik abian egon dela aurretiko bozketa. Gaur, 09:00etatik 20:00etara dute bizilagunek botoa emateko aukera.

Goiaren esanetan, "urrats garrantzitsua" da honakoa. Guztira, Igeldon erroldatutako 16 urtetik gorako 984 igeldoar deitu dituzte bozkatzera.

Kontsultan, galdera hau egingo dute: "Ados al zaude Igeldo tokiko entitate txiki gisa eratzearekin?". Erantzunen artean, baiezkoa edo ezezkoa soilik egongo dira aukeran. Beste edozein erantzun duten boto-paperak boto zuri izango dira. Gaur bertan egingo dute zenbaketa, eta bukatutakoan emango dute emaitzaren berri.

Donostiako alkatearen arabera, aldeko botoak gailentzen badira, Gipuzkoako Foru Aldundiari igorriko diote txostena, erabakia foru dekretu bidez jaso dezan.