A21erako hauteskunde mahaien zozketa egin dute hiriburuetan

Apirilaren 21eko hauteskundeetako mahaiak osatuko dituzten pertsonak izendatzeko zozketak gaur, martxoaren 21ean, egin dituzte Bilbon, Donostian eta Gasteizen.

Zozketak Bilboko osoko bilkuren aretoan, Donostian, Udalinfok Easo kalean duen bulegoan eta Gasteizen udaletxeko prentsa aretoan izan dira.  

Funtzio hori betetzen duten herritarrei martxoaren 22tik 28ra bitartean emango zaie jakinarazpena, eta mahaietako kide ez izateko alegazioak aurkeztu ahal izango dituzte Eskualdeko Hauteskunde Batzordean martxoaren 23tik apirilaren 4ra bitartean.

Jaurlaritzako Segurtasun Sailak baieztatu duenez, hauteskundeen egunean 2.700 mahai inguru egongo dira EAEn, horietatik 428 Araban, 1.411 Bizkaian eta 859 Gipuzkoan.

Bakoitzak hiru kide izango ditu (lehendakari bat eta bi bokal), baita bi ordezko ere.

Hala, apirilaren 21ean 24.300 pertsona inguru joango dira hauteskunde-mahaietara.