Euskal hitzarmenen lehentasuna onartuko dela bermatu du Diazek: "Gure hitza beteko dugu"

Yolanda Diaz bigarren presidenteorde eta Lan ministroak ziurtatu du inbestidura akordioa beteko dela euskal hitzarmenak sektoreko eta Estatuko hitzarmenen aurretik lehenesteko. Neurri hori bertan behera geratu zen langabeziagatiko subsidioa erreformatzeko dekretua onartu ez zenean.

"Gure hitza beteko dugu eta hori egingo da", ziurtatu du Diazek Kongresuko Lan Batzordean. Presidenteordeak legealdi honetan Lan Ministerioak jarraitu beharreko ildo nagusiak azaldu ditu bertan.

Diazek konpromiso horren berri eman aurretik, Idoia Sagastizabal EAJk Kongresuan duen bozeramaile ekonomikoak ohartarazi dio bigarren presidenteordeari neurri hori "bai ala bai" sartu behar dela Lan Ministerioak aurkezten duen hurrengo lan-araudian, hurrengo jeltzaleen aldeko botoa lortu nahi badu.

Oskar Matute EH Bilduko bozeramailea ere bat etorri da EAJren hausnarketarekin, eta ohartarazi du euskal hitzarmenak Estatuko eta sektoreko hitzarmenen gainetik ez lehenestea "errealitate zehatz bateko langileentzat kaltea dela".

Bestalde, Espainiako Gobernuko bigarren presidenteordeak esan du asteko lanaldia 37,5 ordura murriztea adosten saiatuko dela, baina erreforma horrekin aurrera jarraituko duela ohartarazi du, nahiz eta patronalak akordioarekin bat egin ez, gutxieneko soldataren igoerarekin gertatu zen bezala.

"Akordioa ixten saiatuko gara, hirukoa izan ezin bada bi aldekoa izango da (Gobernua eta sindikatuak), baina elkarrizketa sozialaren eta Parlamentuaren esparruan egingo dugu", argi utzi du.

Zentzu horretan, Antonio Garamendi CEOEko presidenteak ez du baztertu lanaldiaren murrizketaz hitz egitea, baina "sektorez sektore" eta "negoziazio mahai bakoitzean, beti egin den bezala" egin behar dela zehaztu du.

"Inor ez da ari esaten lanaldia ezin dela murriztu; izan ere, produktibitate handiagoko sektore batzuek lanaldi txikiagoa dute. Sektore guztiak ez dira berdinak, horregatik mahai bakoitzean sektorez sektore egitea planteatzen dugu, beti egin den bezala", adierazi du Garamendik 'Innovacion Turistica-Hotusa Explora' foroan.