Puigdemontek gaur jakinaraziko ditu Sanchezen inbestidura negoziatzeko JxCaten baldintzak

Gaur jakingo da JxCat alderdiak PSOErekin balizko inbestidura-itun bat erdiesteko baldintzak zeintzuk diren. Carles Puigdemont Generalitateko presidente ohiak emango ditu jakitera Bruselatik, 11:00etarako iragarri duen agerraldian.

Hain zuzen ere, Puigdemontek atzo Yolanda Diaz Sumarreko buru eta Espainiako Gobernuko jarduneko bigarren presidenteordearekin izandako batzarraren biharamunean argituko dira zalantzak. Bi agintariok Kataluniarako "irtenbide demokratiko guztiak aztertzea" adostu zuten batzarrean, Sumarrek eta JxCatek elkarrekin kaleratu zuten agiri batean zehaztu zutenez. Espainiako Gobernuak argi utzi nahi izan zuen ez zuela zerikusirik bilerarekin, eta Diaz Sumarren izenean joan zela hitzordura.

Joan den astean X sare sozialean zabaldutako mezu batean jakinarazi zuen Generalitateko presidente ohiak gaur jarriko duela mahai gainean bere alderdiaren proposamena balizko inbestidura akordio batera begira. Haren arabera, alderdiekin "elkarrizketak bai", baina "ez dugu inorekin negoziaziorik martxan" eta "ez diogu inori gure proposamena aurkeztu". Ohartarazi zuenez, elkarrizketa eta negoziazioa "ez dira nahastu behar", ez baitira sinonimoak. 

Pedro Sanchez Espainiako Gobernuko jarduneko presidenteak, bere aldetik, akordioa "beldurrik gabe, anbizioz eta ausardiaz" egin daitekeela esan zuen atzo, eta baikor agertu zen bere inbestiduraren aurrean.

Ildo horretan, Ione Belarra Podemoseko idazkari nagusi eta Eskubide Sozialen eta 2030 Agendaren jarduneko ministroak esan du "funtsezko elementua" dela PSOEk Junts "legezko aktore gisa" aitortzea inbestiduraren negoziazioei begira eta "gehiengo plurinazionalaren" babesarekin gobernu bat osatzeko.