Politika -
U23
PSOEk atea zabaldu dio Feijooren balizko inbestidura saiakerari, "hirugarrenez porrot egin dezan"
"Estatuburuak erabakitzen duena beti egongo da ondo", sozialisten esanetan, eta erregeari presioa egin izana ukatu dute, "PPk egunero egiten badu ere".
Agentziak | EITB Media
PSOEtik argi utzi dute ez diotela Alberto Nuñez Feijoo PPko buruari "hirugarrenez porrot egiteko ideia" kenduko, lehenik faltsutzat jo duten inbestidura batera joan nahi badu. Gainera, argi utzi nahi izan dute ez diotela erregeari presiorik egin Pedro Sanchez PSOEko idazkari nagusiari Gobernua osatzeko enkargua eman diezaion, euren ustez, Alderdi Popularra kontrakoa egiten ari bada ere.
Astelehen honetan, Felipe VI.ak talde parlamentarioekin inbestidurarako hautagaia aukeratzeko egindako kontsulta sortaren lehen egunean, Esteban Gonzalez Pons PPko Erakunde idazkariordeak esan du alderdia ez dela eserita geratuko "Pedro Sanchezen Gobernua Espainia maite ez dutenekin etor dadin".
PSOEk ukatu egin du "PPrekin lehian egotea, inbestidurara lehenengo nor joango den ikusteko", eta "errespetu osoa" agertu diote Espainiako erregeak asteartean, behin kontsultak amaituta, hartu beharko duen erabakiari; izan ere, Sanchez eta Feijoo hartuko ditu, eta Zarzuelara joaten azkena izango da azken hori.
Sozialisten ustez, "badirudi" PPko buruak "informazio gehiago behar duela shocketik ateratzeko, eta inbestidura 'fake' bat izan behar badu, hala bedi", esan dute Feijook, bere alderdia hauteskundeetan bozkatuena izan zela argudiatuta, inbestidurarako hautagai izateko agertutako borondateari buruz.