Politika -
NAFARROAKO GOBERNUA
EH Bilduk hasi du Chiviteren inbestiduran abstenitu ala ez erabakitzeko kontsulta
Koalizioak EITBri baieztatu dionez, Maria Chiviteren inbestidura saioan abstentziora jotzea babesten duten galdetuko die militanteei. Galdeketa telematikoa izango da, eta emaitzak ostegunean ezagutuko dira.
EITB MEDIA
EH Bilduren oinarriek asteazken honetan erabakiko dute koalizioa abstenitu egingo den ala ez Maria Chivite bigarrenez Nafarroako presidente izendatzeko inbestiduran. Koalizioak EITBri baieztatu dionez, dagoeneko abiatu du militanteei galdetzeko prozedura, eta galdeketa gauerdian hasi eta 24 ordu iraungo du.
Hau da erantzun beharreko galdera: "Bat egiten al duzu, datozen egunotan deitua izango den Nafarroako Lehendakaria aukeratzerako inbestidura saioaren aurrean, Nafarroako Mahai Politikoak EH Bilduko parlamentarien abstentzioaren bidez PSNko Chivite anderearen hautagaitzari bide ematearen aldeko irakurketa eta proposamenarekin?".
Kontsulta modu telematikoan egingo da, eta emaitzak ostegunean jakinaraziko dira.
Iragan astean, EH Bildu baiezko botoa emateko prest agertu zen Maria Chivite PSNko hautagaiaren inbestidura "desblokeatzeko", eta horri buruz militanteei galdetuko ziela iragarri zuen.
Atzo, Geroa Baik, PSNk eta Zurekin Nafarroak Gobernua osatzeko akordioa lortu arren, Maria Chivitek EH Bilduren abstentzioa behar du Nafarroako Gobernuko presidente izateko.