Politika -
Elkarrizketa Radio Euskadin
Otegik errespetu osoa adierazi dio Juntsen estrategiari, eta "zarata gutxi" gomendatu du negoziaketetarako
EH Bilduko koordinatzaile nagusiak esan du PSOEri dagokiola Kataluniako alderdiari zerbait eskaintzea, eta azpimarratu du bere koalizioak “ahal dugun guztia” egingo duela PPk eta Voxek ez gobernatzeko, baita Sanchezen inbestiduraren alde bozkatzea ere.
Mikel Dominguez | EITB Media
Arnaldo Otegi EH Bilduko koordinatzaile nagusiak Radio Euskadin esan duenez, bere koalizioak Pedro Sanchezen inbestidura eraztuko du "eskuin erreakzionarioak" ez gobernatzeko. Sanchezen inbestiduran baiezko botoa "beharrezkoa balitz, egingo genuke".
Koalizioaren koordinatzaile nagusiak ziurtatu duenez, euskal gizartearen "mezu argia" —ez du "bloke erreakzionarioaren" gobernurik nahi— jarraituko dute, baina bere botoak bakarrik ez dira nahikoa izango hori saihesteko, Juntsen baiezkoa ere beharrezkoa baita.
"Errespetu handia diet gainerakoen estrategiei, alderdi politiko bakoitzak eta herrialde bakoitzak erabakitzen duenari", azpimarratu du Otegik, Juntsi erreferentzia eginez. Buruzagi abertzalearen ustez, Kataluniak ere "masiboki" bozkatu du PPren eta Voxen gobernua eragozteko, "baina haiek erabaki beharko dute".
Otegik "zarata gutxi eta lan handia" gomendatu du Junts eta PSOEren arteko negoziazioetan, "publikoan gutxi eta pribatuan asko eztabaidatzea". Bere ustez, orain "pilota PSOEren teilatuan dago", ezin baita izan alternatiba "beti independentisten menpe egotea, arazo nazionalaz hitz egiten hasi gabe". "Puigdemonti hausnarketa hori egingo nioke, eta erabakitzen duena errespetatuko nukeela esango nioke", esan du Otegik.
EH Bilduren hauteskundeetako emaitzei dagokienez, Otegik uste du euskal gizarteak "osotasunean" baloratu dituela udalen kudeaketa eta "Madrilen egindako lana". Azpimarratu duenez, koalizioa "hazi besterik ez da egiten", baina "ez da obsesio bat" Eusko Legebiltzarrerako hauteskundeetan indar bozkatuena izatea. "Aldaketarako proiektua eta programa aurkeztuko ditugu, eta jendeak erabakiko du, dramarik eta katastrofismorik gabe", gaineratu du.
