Eider Mendoza: "Auzitegi Konstituzionalaren epaiak euskararekiko errespetu falta nabarmena adierazten du"

Eider Mendoza Gipuzkoako ahaldun nagusiak "desadostasun irmoa" agertu du Auzitegi Konstituzionalaren epaiarekin; izan ere, epai horrek bertan behera utzi du EAEko udaletan euskara lehentasunez erabiltzeko eskakizuna, eta esan du erabaki horrek "sakoneko errespetu falta" erakusten duela euskararekiko eta euskaraz hitz egiten duten pertsonekiko.

Mendozak ohar baten bidez jakinarazi duenez, "oso larria da euskal erakundeek azken urteetan Administrazioan euskararen erabilera sustatzeko hartutako erabakien aurka egiteko auzitegietan ezartzen ari den joera". 

Hori dela eta, bat egin du Eusko Jaurlaritzak "euskara jasaten ari den judizializazio handiagatik" egin duen salaketarekin, eta "erabateko babesa" adierazi die "barne lanean euskara indartu eta lehenestea erabakitzen duten udalei".

"Euskal autogobernuarekiko eta euskara biziberritzeko hainbat hamarkadatan egindako ibilbidearekiko errespetu falta" ere badela dio, eta ildo horretan "erabaki eraginkorrak hartzea erakundeen ardura" dela azpimarratu du.