Politika -
M28
EAJk eta PSE-EEk akordioa itxi dute Bilbon, eta sozialistek Udaleko bost arlo zuzenduko dituzte
Konkretuki, sozialistek zuzenduko dituzte Mugikortasun eta Iraunkortasun Politiken Koordinazioa, Hiri Berroneratzea, Garapen Osasungarria, Etxebizitza eta Hezkuntza arloak, aurreko legealdian baino bat gehiago.
Agentziak | EITB Media
EAJk eta PSE-EEk akordioa itxi dute Bilbon "gobernu sendo eta egonkor bat" eratzeko, eta horren arabera, sozialistek Udaleko bost arlo zuzenduko dituzte, aurreko legealdian baino bat gehiago, Hezkuntza Sailaren ardura ere izango baitute.
Zehazki, jeltzaleak arduratuko dira Alkatetzaren eta Kultura Politiken Koordinazioaz, Gizarte Politikaz, Hiri Garapeneko Politiken eta Proiektu Estrategikoez, Segurtasunaz eta Politika Ekonomikoaz. Bestalde, sozialistek Mugikortasun eta Iraunkortasun Politiken Koordinazioa, Hiri Berroneratzea, Garapen Osasungarria, Etxebizitza eta Hezkuntza zuzenduko dituzte.
Agiri bateratu batean, bi alderdiek uste dute akordio horri esker aurrera egin ahal izango dela "hiriaren eraldaketa prozesuan, alde hirukoitzean, sozial, ekonomiko eta urbanistikoan", baita administrazio "gero eta hurbilago, irekiago eta eraginkorrago" batean ere.
Azaldu dutenez, 2023-2027 agintaldirako Bilboko Udalean "egonkortasuna eta gobernagarritasuna bermatzen" duen akordioa erdietsi dute.