Gorrotxategi: "Nire sen politikoaren arabera, hezkuntzaren alorrean akordioa egongo da"

Miren Gorrotxategi Elkarrekin Podemos-IUk Eusko Legebiltzarrean duen bozeramailearen ustez, litekeena da Eusko Legebiltzarreko lau alderdi nagusiek (EAJ, PSE-EE, koalizioa bera eta EH Bildu) akordioa lortzea etorkizuneko Hezkuntza Legearen zirriborroaren inguruan. "Nire sen politikoaren arabera, akordioa egongo da", aitortu du. Legebiltzarreko taldeek arratsaldean bozkatuko dituzte testuari egindako zuzenketak.

Radio Euskadiko "Boulevard" saioan egindako elkarrizketa batean, koalizio morearen eledunak esan du atzo gauean "berandura arte" egon zirela agiriaren hainbat arlo adostu nahian. Argitu duenez, asteazkenean Jaurlaritza osatzen duten bi alderdiekin erdietsitako aurreakordioa ixteko pausoak eman dituzte: "Asteazkenetik hona beste gai batzuk ere sartu ditugu, baina badira oraindik findu eta hobetu beharreko puntuak. Elementu horiei guztiei forma koherentea eman behar zaie. Zintzilik geratzen diren gaiak ez dira hain nabarmenak, baina txikikeriak ere ez dira".

Ituna lortzeko zailtasun handienez galdetuta erantzun duenez, "puntu asko" izan dira "eztabaidagai", eta "eztabaida sutsuak" egon direla erantsi du; euskararen gaia ez da "desadostasunaren iturri nagusia" izan, argitu du. Elkarrekin Podemos-IUrentzat, bi izan dira gakoak: gaur egungo sistemak duen "arazo larria", segregazioa, konpontzea eta euskal eskola publikoaren papera indartzea, "hori delako denona, guztiok hartzen gaituena". Halaber, iragarri du "kontzertazio unibertsala jada ez dela posible izango".

"Zuhur" agertu bada ere, lau taldeek hezkuntzaren alorreko akordioan egon nahi dutela adierazi du, "herri akordioa" beharrezkoa dela uste baitute. Gorrotxategiren esanetan, "nire sen politikoaren arabera, hezkuntzaren alorrean akordioa egongo da; agian gogoa da intuizioa baino gehiago, hainbeste lan egin ondoren, eta batez ere erantzukizun sentsazioagatik ere. Nik espero dut akordio hori posible izatea".

Hezkuntzako gehiengo sindikalak martxoaren 25erako deitu duen grebaren harian, Gorrotxategik esan du espero duela lantaldearen behin betiko testuan sartuko dituzten aldaketekin "sindikatuak asebete geratzea" eta "euren mobilizazioak egitera behartuta ez egotea". Dena dela, "ekintza sindikalari erabateko errespetua" agertu dio.