Jaurlaritzak barkamena eskatu dio Fabio Morenoren familiari, "beste aldera begiratzeagatik"

Beatriz Artolazabal Berdintasun, Justizia eta Gizarte Politiketarako sailburuak barkamena eskatu dio Fabio Moreno haurraren familiari, ETAk duela 30 urte hildako umearen sendiari, "beste aldera begiratzeagatik eta ahotsa altxatzeko denbora behar izateagatik".

1991ko azaroaren 7an ETAk lapa lehergailu bat jarri zuen Antonio Moreno guardia zibilaren ibilgailuaren azpian. Erandion bizi zen La Salveko komisariako guardia zibila, eta bi urteko bi semeekin zihoan autoan bonbak eztanda egin zuenean. Fabio Moreno hil egin zen, eta aita eta anaia zauritu egin ziren.

Atentatuaren 30. urteurrenean, Erandioko Udalak omenaldia egin dio gaur Fabio Morenori, eta senideez gain, Artolazabal bera, Aitziber Oliban alkatea, Monika Hernando Giza Eskubideen, Biktimen eta Dibertsitate zuzendaria, Florencio Domingez Terrorismoaren Biktimen Zentro Memorialeko zuzendaria eta alderdi politikoetako ordezkariak, EH Bildukoak barne, egon dira.

"Ez dakit beti maila eman dugun eta nahikoa gertu egon garen. Ezetz uste dut. Bihotzarekin hitz egiten dizuet. Bereziki zuri, Arantxa. Barkatu izan dugun isiltasunengatik, beste aldera begiratzeagatik, gure beldurrengatik, ahotsa altxatzeko denbora behar izateagatik, zuen mina sentitu ez izanagatik", azpimarratu du Artolazabalek.

"Hemen inork ez du irabazi, guztiok sufritu dugu"

Alexek ere hartu du hitza ekitaldian, Fabio Morenoren anaiak, eta eskerrak eman dizkie ekitaldia posible egin duten "pertsonei", "ez erakundeei ez alderdi politikoei".

Bere esanetan, garrantzitsuena da hurrengo belaunaldiek argi ikustea indarkeriak ez duela "onurarik" ekarri, "baizik eta biktimak eta sufrimendua". "Hemen inork ez du irabazi eta guztiok sufritu dugu", azaldu du.

Bestalde, Aitziber Oliban alkateak iragarri du Erandion Fabio Morenoren izeneko parke bat egongo dela, bere "oroitzapena presente" edukitzeko.

Omenaldia amaituta, udaletxeko behealdean jarri duten erakusketara joan dira. Bertan terrorismoaren eta segurtasun indarren biktimen lekukotzak jasotzen dituzten bideoak jarriko dituzte.

Herriko ikasleak eramango dituzte erakusketara, eta hilaren 11n, 19:00etan, mahai-inguru irekia egingo dute, zenbait biktimaren parte-hartzearekin.