Etxerik gabeko pertsonen plan berriak pandemiak ekarritako beharrak jaso beharko ditu

2018-2021 aldirako Etxerik Gabeko Pertsonentzako Euskal Estrategia ebaluatu eta estrategia berri bat egin dezala eskatu dio gaur Legebiltzarrak Jaurlaritzari,  pandemiaren ondorioz sortu diren profil berrien beharretan eta balorazio horren ondorioetan oinarrituta.

Era beran eskatu diote gainerako erakundeekin eta hirugarren sektore sozialaren pandemia garaian abian jarritako batzordeari eusteko eskatu diote, martxan jarritako ekimenak ebaluatu eta etxerik gabekoei arreta ematen jarraitu ahal izateko, pandemia egoera oso kontuan hartuta.

Isabel Gonzalez legebiltzarkideak Elkarrekin Podemos-EB taldearen mozio bat aurkeztu du etxerik gabeko pertsonen inguruan, etxerik gabeko pertsonen kolektiboari arreta emateko estrategia "integrala" eta "egungo estrategiak dituen akatsak ez errepikatzeko" eskatzeko. Izan ere, Gonzalezen ustez pandemiak erakutsi du estrategia horrek ez duela "berdin balio" administrazio guztietan, eta "Eusko Jaurlaritza dela erakundeen arteko eta sailen arteko koordinazioak erabaki dezakeela gainerako administrazioei azkar eta premiaz erantzuteko gaitasuna".

Ez dira onartu ez Elkarrekin Podemos-EB taldeak aurkeztutako mozioa, ez eta honek EH Bildurekin adostutako zuzenketa transakzionala ere, azkenean Gobernuko taldeek (EAJ eta PSE-EE) eta PP-Cs-k aurkeztutako testua onartu baita, aurkeztu dutenen aldeko botoekin eta EH Bildu, Elkarrekin Podemos-EB eta Vox-en abstentzioarekin. 

Taldeen txandan, Joseba Diez EAJko legebiltzarkideak esan du "bidezkoa" dela onartzea pandemia iritsi zenean lanean ari zela Gobernua, 2018-2021 aldirako etxerik Gabeko Pertsonentzako Euskal Estrategiak ezarritako "jarduera-ildo argiekin", lurralde mailan "baliabideak modu egokian banatzea ahalbidetzen zuena". Diezek berretsi du "Gobernuak azkar eta ondo erantzun" zuela.

Nerea Kortajarena EH Bilduko legebiltzarkideak azaldu duenez, eragile sozialek ohartarazi dute "harrerarako tokia falta dela, erantzunak koordinatu behar direla, neurriak hartu behar direla eta zerbitzu berriak antolatu behar direla". EH Bilduren ustez, Eusko Jaurlaritzaren estrategia "ez da eraginkorra izan, ez da gai izan arazoa desagerrarazteko, ezta gutxienez hura murrizteko ere"; hori dela eta, plana berrikusteaz gain, "konpondu" egin behar dela uste du, eta EAJren, PSE-EEren eta PP+Cren testua "motz" geratzen dela uste du.

PSE-EEko Gloria Sanchez legebiltzarkideak adierazi du ezin dela "inolaz ere" hitz egin "pobretasunarekiko fobiaz", are gutxiago pandemia garaian Eusko Jaurlaritzak "etxegabeei zuzendutako neurri ugaro martxan jarri dituela ikusita". Gogorarazi du, gainera, egungo Etxerik Gabeko Pertsonen Euskal Estrategia amaitzear dagoela eta Gizarte Politiketako Sailak pandemiak iraun bitartean martxan jarritako ekimenak hurrengo estrategian sartzeko "nahia" adierazi duela.

PP+Cs taldeko Laura Garridok nabarmendu du etxerik gabeko pertsonen egoera "zaila" dela, eta pandemiak "larriagotu" egin duela, eta defendatu du garatzen diren politiken "berehalako" beharrak betetzea izan behar dutela helburu, hala nola etxebizitza eta janari beharrak, baina gero "integratzen laguntzeko prestakuntza" eman behar zaiela.

Azkenik Voxeko Amaia Martínezek esan du "etxea izan ala ez, pertsona guztiek dituztela eskubideak, baina baita betebeharrak ere" ea uste du eta ekimena "klase ertainak sistematikoki sarraskitzean" datzala, "guztiak behetik berdintzeko".

Etxerik gabekoentzako txertoak

Elkarrekin Podemos-EBk etxerik gabeko pertsonak kontuan hartzeko eskatu dio Eusko Jaurlaritzari, covid-19aren aurkako txertaketa-estrategian, Gobernuak "ahaztu" egin dituela uste baitu. "Sistema malgu bat planteatu beharko litzateke, txertoa erraz hartzeko aukera emango duena", proposatu du.

Joseba Diezek jakitera eman duenez, Eusko Jaurlaritza kolektibo horri Janssenen txertoa ipintzea aztertzen ari da; izan ere, dosi bakarrekoa denez, "egokiagoa izan daiteke identifikazioagatik edo txertoa jartzerakoan txertoa hartzeko aukera izateagatik".