Ramiro Gonzalez: "Frankismoaren biktimak oraindik areketan daude"

Arabako Foru Aldundiak eta Batzar Nagusiek omenaldia egin diete ostiral honetan Arabako frankismo garaiko eta Gerra Zibileko biktimei, eta loreak utzi dituzte Gasteizko monolitoan. Ramiro Gonzalez Arabako ahaldun nagusiak gogorarazi duenez, "biktimak oraindik areketan daude".

Aurten, koronabirusaren pandemia dela eta, ez da egin foru erakundeak eta Arabako Batzar Nagusiek irailaren 18an urtero egiten duten ekitaldi instituzionala, 1936an tropa frankistek Teodoro Olarte Arabako Foru Aldundiko Kudeaketa Batzordeko presidentea fusilatu zuten egunarekin bat etorriz.

Horren ordez, "In Memoriam" monolitoaren ondoan lore bat uzteko deia egin diete bi erakundeek herritarrei, Aldundiaren eraikinaren atzealdean frankismoaren eta Gerra Zibilaren biktimak gogorarazteko.

Herritar anonimoak eta erakundeetako eta alderdietako ordezkariak bertaratu dira goizean monolitoaren ondoan loreak uztera.

Ahaldun nagusiarekin batera, Bakartxo Tejeria Eusko Legebiltzarreko presidentea, Pedro Elosegi Arabako Batzar Nagusietako presidentea, Javier Hurtado Turismo, Merkataritza eta Kontsumo sailburua, Cristina Gonzalez Arabako sozialisten idazkari nagusi eta foru diputatua eta horren alderdiko beste kide eta kargudun batzuk izan dira bertan.

Kike Fernandez de Pinedo EH Bilduren Arabako Batzar Nagusietako bozeramailea, Gorka Urtaran Gasteizko alkatea eta Beatriz Artolazabal Berdintasun, Justizia eta Gizarte Politiketako sailburua ere bertaratu dira.

Komunikabideei egindako adierazpenetan, Arabako ahaldun nagusiak esan du, beste urte batzuetan bezala, frankismoaren biktimentzako "egia, erreparazioa eta justizia eskatzen jarraitu behar dela", eta egia osoa ezagutzeko eta pertsona horiek aitortzeko beharra azpimarratu du.