Politika -
Espetxe-politika
Presoen auziaren inguruko adostasuna sendotu egin dela iragarri du Foro Sozialak
Elkarbizitzaren eraikuntzarako baldintzak "bermatuta" daudela adierazi du Foro Sozialak, izan ere, Eusko Legebiltzarrean "% 75eko batasuna" omen dago alderdien artean.
AGENTZIAK | ERREDAKZIOA
Legealdi berri hau ebatzi gabe gelditu ziren kontuak argitzeko "aukera bikaina" dela esan du Foro Sozialak. Besteak beste, "biktima guztiei merezitako arreta eskaintzea" bilatuko dute, espetxe-politika aldatzearen eta memoria inklusiboago baten alde egitearen bidez".
Agus Hernan eta Teresa Toda ordezkariek legealdi berri honetako lehen prentsaurrekoa eskaini dute, eta abagunea aprobetxatu dute politikariei zorrean dauden kontu horiei ekiteko eskatzeko. Halere, jakin badakite legealdi honetako lehentasunak beste batzuk izango direla.
Foro Sozialak jakitera eman duenez, elkarbizitzaren eraikuntzarako baldintzak "bermatuta" daude, Eusko Legebiltzarrean "% 75eko batasuna" omen baitago EAJ, EH Bildu, PSE-EE eta Podemos alderdien artean. Gauzak horrela, adostasun horren alde dauden ordezkariek % 90,6 osatzen dute eta aurka daudenek, ordea, % 25.
Terrorismoaren aurkako borrokari zuzendutako espetxe-politika aldatu eta araudi arruntaren eta normalizazioaren alde egitea eskatu du Foro Sozialak. Horretarako, Euskal Herriko ETAko presoen gerturatzea ahalbidetzea galdegin dute. "Adostasun guztiak hitzartuta daude jada eta une batetik bestera horiek martxan jartzea soilik falta da". Arazoa konpondu ezean, "COVID-19aren pandemiak presoek jasotzen dituzten bisitetan eragin handia" izango duela adierazi du Foro Sozialak.
Memoria barneratzailearen alde egin du Foro Sozialak. Ildo horretan, hainbat zailtasun atzeman dira alderdien arteko adostasunari dagokionez.
Azkenik, ondorio zorrotzak atera ezean, Foro Soziala beldur da hala-moduzko irtenbide bat bilatu eta azkar ahaztuko den gaia izango dela.