Gobernuak Madrilen duen ordezkariaren aurkako auzia artxibatzea eskatu du Fiskaltzak

Jose Manuel Franco Espainiako Gobernuak Madrilen duen ordezkariaren aurkako auzia artxibatzea eskatu dio Madrilgo Fiskaltzak Carmen Rodriguez-Medel Madrilgo 51 zenbakiko Instrukzio Epaitegiko titularrari. Franco prebarikazio administratiboko delitu batengatik ikertzen ari dira, koronabirusa tarteko, elkarretaratze jendetsuak baimentzeagatik, hala nola martxoaren 8ko martxa feminista.

Ohar baten bidez jakitera eman duenez, Fiskaltzak helegitea aurkeztu du epailearen martxoaren 23ko autoaren aurka; horren bidez, onartu egin zuen partikular batek Francoren aurka egindako salaketa, 2020ko martxoaren 5etik 14ra bitartean manifestazioak egitea baimentzeagatik.

Fiskaltzaren helegitea Espainiako Gobernuak Madrilen duen ordezkariak Rodriguez-Medel epailearen aurrean deklaratu baino bi egun lehenago iritsi da, auzi horretan ikertu gisa deklaratzera deitu baitute. Bertan, Gaixotasunak Prebenitzeko eta Kontrolatzeko Europako Zentroaren ohartarazpenak alde batera utzi ote zituen argitu nahi dute; izan ere, martxoaren 8a baino sei egun lehenago erakunde horrek txosten bat egin zuen elkarretaratze guztiak bertan behera uzteko eskatzeko, baita kutsadurak saihesteko osasun-gomendioak zabaltzeko ere.

Fiskaltzak auzi horri buruzko iritzia ematen duen lehen aldia da, eta, idazkian azaldu duenez, "egoera hori instrukzio-epaileak alarma-egoera deklaratzeagatik prozesuko epeak etetea aplikatu izanaren ondorio da". Etete hori ekainaren 4an amaitu zen.

"Prozedura hasteko autoari aurre egiteko" eta "ordutik egiten ari diren jarduera gehienak baloratzeko" orain "une prozesala" dela adierazi du. Ildo horretan, Gobernuaren ordezkaria ordezkatzen duen Estatuko Abokatutzarekin ados agertu da, eta auto hori "baliogabea" dela uste du, defentsa-gabezia eragiten duelako.

Ez zuen ebazpenik eman eta ez zuen modu arbitrarioan jardun

Hala, Fiskaltzak esan du Francok ez duela prebarikazio-deliturik egin. "Komunikazio bat jasotzea ez da ebazpena ematea", azpimarratu du fiskalak, eta jarduera hori "legez kanpokoa" izateaz gain, "arbitrarioa" ere izan behar dela azpimarratu du.

Hori dela eta, "ebazpenik ez emateaz gain", ezin zaio Francori jokabide arbitrarioa izan izana leporatu, "ordenamendu juridikoa urratzen duen jarduerarik edo omisiorik egin ez duelako, bere borondate pertsonala gailentze aldera".

Gainera, ez du uste "zentzuzkoa" denik osasun-arrazoiengatik manifestazioak debekatzea, "osasun publikoaren arloko eskumenak, eta, zehazki, zaintza epidemiologikoa prebenitzeko neurriak hartzea, beste administrazio organo bati zegozkiolarik".