Urkulluk hezkuntza presentziala defendatu du "ezberdintasunari aurre egiteko"

Deseskalatzean aurrera egiteko asmoz, hezkuntza-jarduera presentziala errazteko eskatu dio Iñigo Urkullu lehendakariak Pedro Sanchez Espainiako Gobernuko presidenteari igande honetan izandako Erkidegoetako presidenteen 10. bideokonferentzian. Urkulluren iritzian, "hezkuntza presentzialak, ikastetxeei bidalitako protokolo zorrotzak jarraituta, ikasle ahulenen ezberdintasunari aurre egiten dio". Lehendakariaren esanetan, "ikasteko zailtasunak edo arazo sozial, familiarrak nahiz eten digitala pairatzen dutenek" behar dute bereziki errefortzu presentzial hori.

Gaurko egoeraren nondik norakoak aztertzen hasi du Urkulluk bere hitzaldia. "Osasun krisiaren arorik latzena gainditzen ari gara. Hori lehentasuna da, eta horrela jarraituko du, baina ekonomiagatik kezka ere zabaltzen ari da, krisi horrek ekintza ekonomikoan eta enpleguan izango duen eragina, alegia", adierazi du. Hori dela eta, "osasunaren eta oparotasunaren arteko oreka hori lortzea izango da gakoa", gaineratu du.

Euskadi deseskalatzearen 1 fasean dago astelehenaz geroztik eta, horren harira, Urkulluk azpimarratu du, EAEn "zuhurtzia plusa ezarri dugu", udalerri bakoitzaren barruan bakarrik mugitzeko murrizketa aipatuta, "gizartean prebentzio neurrien lasaikeria saihesteko".

Datorren astera begira, Urkulluk bost proposamen egin ditu. Lehenengoa higiene eta segurtasun neurriekin lotutakoa da. Horrela, "etxetik kanpo eta leku itxietan edo pertsonen arteko distantzia minimoa gordetzea ezinezkoa den egoeretan babes-maskara" derrigorrez eta beti erabiltzea eskatu du.

Bigarren proposamena paseatzeko ordutegi tarteei dagokio. "Deseskalatzearen lehenengo momentuetan erabilgarria izan bada, orain nahasmena eragiten du herritarren artean", Urkulluren hitzetan. Hori dela eta, ordutegi tarte horiek malgutzeko eskatu dio Sanchezi, "adinekoentzako eta bereziki babestu beharreko arrisku taldeentzako ordutegi tarteak mantenduta".

Gainera, deseskalatzearen bigarren fasean kultura-ekitaldietako eta ostalaritza lokaletako edukiera % 50ekoa izatea eskatu dio Espainiako Gobernuko presidenteari, eta aire librean eta modu seguruan inguru naturaletan egindako jarduerak baimentzea, esaterako, mendi-ibilbideak.

Azkenik, "kogobernantza eredua garatzera" deitu du Sanchez, "egungo egoerei aurre egiteko balioko digun legezko esparrua eraiki ahal izateko".