Arriola, San Jose eta Beltran de Herediak ere agerraldia egingo dute Legebiltzarrean

Iñaki Arriola Ingurumen, Maria Jesus San Jose Lan eta Estefania Beltran de Heredia Segurtasun sailburuak ere agerraldia egingo dute Eusko Legebiltzarrean, datorren asteartean, Iñigo Urkullu lehendakariarekin batera, Zaldibarko zabortegiko luiziaren nondik norakoak azaltzeko.

Diputazio Iraunkorreko Mahaiak aurreko ostegunean erabaki zuen, EH Bilduk, Elkarrekin Podemosek eta PPk eskatuta, lehendakariak argibideak ematea bi langile azpian harrapatu zituen, eta oraindik aurkitu ez dituzten, zabortegiko luiziaren inguruan.

Mahaiak agerraldi bakarra egitea eskatzen zuen, eta Arriola, San Jose eta Beltran de Heredia ere bertan izatea.

Eusko Jaurlaritzak atzo iragarri zuen lehendakaria datorren asteartean, 09:30ean, joango dela Diputazio Iraunkorrera azalpenak ematera. Apirilaren 5eko hauteskundeetarako Legebiltzarra desegin zutenez, Diputazio Iraunkorrean izango da agerraldia.

Azkenean, baina, lehendakaria ez da hitz egingo duen bakarra, hiru sailburuk ere hitza hartuko baitute, Jaurlaritzako iturriek baieztatu dutenez.