Mendia: "Eskuinaren gehiegikeriak zuzendu ondoren, erasora jotzeko ordua da"

Idoia Mendia PSE-EEko idazkari nagusi eta lehendakarigaiak adierazi duenez, "atzeraldi handian zehar eskuinak egindako gehiegikeria guztiak zuzentzen urteak eman ondoren, eta Euskadin aurretik sekula izan ez duen egonkortasun eta lasaitasun marko bat lortu ostean", "erasora jotzeko eta ekimena hartzeko" garaia da.

Euskadi Activa 2020 jardunaldien amaieran adierazpenak egin ditu Mendiak. Datozen hamarkadetako erronkak aztertu ditu PSE-EEk: fiskalitatea, ekonomia zirkular berria eta belaunaldi arteko ituna enpleguaren eta pentsioen jasangarritasuna ziurtatzeko; eta hurrengo hauteskundeetan aurkeztuko dituzten proposamenak prestatu dituzte.

"Terrorismoaren ondorioak konpontzeke" daudela onartu du PSE-EEko buruzagiak. "Gure erabakia zehaztasunez, diskrezioz, inteligentziarekin eta funtsezko oinarri batekin lan egitea da: iraganean hiltzeko, estortsioa egiteko, bahitzeko eta torturatzeko arrazoirik sekula ez dela izan. Hori onartzen denean soilik elkarbizitzaz hitz egin ahal izango dugu", nabarmendu du.

Mendiaren hitzetan, hurrengo hauteskundeetan (oraindik datarik gabe baina aurten izango dira) PSE-EEren helburua "Eusko Jaurlaritzan gure indarra sendotzea izango da". "Gaur Euskadirentzako aurrerabide eta elkarrizketa beste alternatibarik ez dago: sozialismoa. Ezta Espainian ere. Askatasun eta aniztasun esparru guztiak bermatzeko aukera guztiak sozialismoan daude", azpimarratu du.

Mendiaren ahotan, "garai berri batean gaude, egonkortasuna ez da gehiengo zabalekin neurtzen, akordioetara heltzeko gaitasunarekin baizik". PSE-EE "alderdi eta eragile sozial eta ekonomiko guztiekin adosteko gai da", gogorarazi du. "Batzuk zarata etengabean eta ezegonkortasun sentsazio iraunkor bat emateko tematzen dira. Arduragabekeria politikoaz gain, erabat oker dabiltza", esan du.

"Guk ez ditugu enpresak etsai bezala ikusten. Langileen eta gobernuen aliatuak dira. Herri honetako ekintzailek eta enpresaburuak egonkortasun politiko eta sozialarekin hobeto moldatuko dira. Hori desorekak orekatuz eta desberdintasunak zuzenduz lortuko dugu", erantsi duenez.