Junquerasek eurodiputatu kargua hartu ahal izatea eskatu du Estatuko Abokatutzak

Oriol Junquerasek eurodiputatu kargua hartu eta estatus horri eusten dion bitartean bere eginkizunak betetzeko baimena eman diezaiola eskatu dio astelehen honetan Estatuko Abokatutzak Auzitegi Gorenari. Halaber, Europako Parlamentuan bere immunitatea eteteko tramitea "ahalik eta lasterren" aurkez dezala eskatu dio auzitegi horri.

Espainiako Justizia Ministerioak ohar baten bidez jakinarazi du Estatuko Abokatutzak Gorenaren aurrean aurkeztu duen idazkia, eta Junquerasek bere eginkizun parlamentarioa bete ahal izateko beharrezko neurriak hartzeko eskatu dio, eta, aldi berean, 'proces' auziaren epaia bere horretan betetzeko, sedizioa egotzita 13 urteko kartzela-zigorra ezarri baitzion.

Hala, behin-behineko espetxealdian zegoenean eurodiputatu kargua hartzea baimendu ez zitzaion arren, epai hori baliogabetzea baztertu du Estatuko Abokatutzak idatzi horretan. Ildo horretatik, epaiak "balio osoa" duela esan du, "prozedura penalaren funtsezko arauak zorrotz betez" eman delako.

Horrela adierazi du gaur Estatuko Abokatutzak Europar Batasuneko Justizia Auzitegiaren (EBJA) epaiari egindako alegazio-idazkian. Izan ere, ekainaren 13an eurodiputatu izendatu zutenetik, Junquerasek immunitatea izan behar zuela erantzun zion Europak Auzitegi Gorenari, abenduaren 12an. Horrenbestez, behin-behineko espetxealditik atera eta eurodiputatu akta jasotzeko Europako Parlamentura joateko aukera eman behar izan ziotela ebatzi zuen EBJAk.

Gauzak horrela, Estatuko Abokatutzaren iritziz, "zilegi litzateke" ERCko buruak Hauteskunde Batzorde Zentralera eta Europako Parlamentuaren egoitzara askatasunez joatea, eurodiputatu kargua hartzera. Testuinguru horretan, eurodiputatu hautatua izateak dakarren immunitatea ez dela akta jasotzera mugatzen nabarmendu du Estatuko Abokatutzak. Arrazoi horregatik, Junquerasek estatus parlamentarioari eusten dion bitartean, bere eginkizun parlamentarioa bete beharko luke.

Horrenbestez, bere eginkizuna bermatzeko eta epaia betetzen dela ziurtatzeko, Gorenak "neurri zehatzak" hartu behar dituela uste du Estatuko Abokatutzak. Ildo horretatik, Euopako Parlamentuari Luxenburgoko auzitegiak Junquerasi aitortutako immunitatea eteteko eska diezaiotela dei egin die Goreneko magistratuei. Izan ere, immunitate hori gabe ERCko burua espetxera bueltatu liteke.

Estatuko Abokatutzak, ekainaren 10ean adierazitakoaren ildotik, Europar Batasuneko Justizia Auzitegiaren epaia aztertu ondoren ondorioztatu du Junquerasek eurodiputatu gisa immunitatea izaten jarraitzen duela; izan ere, orain arte, eskuduntza duen Hauteskunde Batzorde Zentralak ez du esan bere zigorra eurodiputatu hautatua izatearekin bateraezina denik.

Gauzak horrela, Estatuko Zerbitzu Juridikoak ez datoz bat Fiskaltzaren jarrerarekin. Izan ere, Europar Batasuneko Justizia Auzitegiaren epaiaren berri izan zen egunean, erakunde horrek argudiatu zuen Junquerasen kasuan ezin dela immunitatea aplikatu, jada ez delako behin-behineko preso bat, irmo zigortutako preso bat baizik.

Gorenak ez du berehalako erabakirik hartuko

Europa Pressi iturri juridiko batzuek adierazi diotenez, orain Junquerasen egoeraz ebatzi behar duen Auzitegi Gorenaren Aretoak ez du berehalako erabakirik hartuko. Generalitatearen presidenteorde ohia aske utziko duten ala ez erabaki aurretik, proces auzia epaitu zuten epaileek "arretaz" aztertu behar dituzte akusazioek eta defentsak aurkeztutako txostenak.

Kontsultatutako iturrien arabera, epaileek "denbora" beharko dute aldeek euren txostenetan azaldutako jarrerei buruzko iritzia emateko. Aretoak aztertu beharreko kontuetako bat da bidezkoa ote den erreguzkoa galdegitea, kontuan izanik Junquerasek kartzela-zigor irmoa duela; halaber, aztertu behar dute espetxean jarraitu behar duen, Europako Parlamentuak erantzuna ematen duen bitartean, eta egoera honek eraginik duen proces auziko epaian.