Vox baztertzea proposatu die Urkulluk Eusko Legebiltzarreko alderdiei

Iñigo Urkullu lehendakariak Voxi 'osasun hesia' ezartzea proposatu die Eusko Legebiltzarreko alderdiei, erakundeen arteko akordioen bidez Santiago Abascalen alderdia "zuritzea" ahalbidetuko duten jarrerak saihesteko.

Unai Urruzunok (EH Bildu) egindako interpelazio bati Eusko Legebiltzarreko kontrol saioan emandako erantzunean egin ditu adierazpenok Urkulluk. Urruzunok Eusko Jaurlaritzaren jarrera zein izango den argitzeko eskatu dio, Madrilgo Batzarrean Vox alderdiaren proposamen bat onartu ondoren. Proposamen horretan, alderdi independentistak legez kanpo uzteko eskatu dio Gobernuari.

Lehendakariak ohartarazi duenez, eskuin muturreko alderdiaren postulatuak autogobernuaren arloan eraikitakoaren aurkako "mehatxu oso serioa" dira. Hori dela eta, batasun sozial eta politikoari eusteko eta "gehiengo demokratikoaren pisua" gauzatzeko, bost puntu onartzeko eskatu die euskal alderdiei.

Horien artean, "mezu populistak erabiliz abantaila politikoa edo elektorala lortzeko edozein asmo ultraren aurrean blokeoa ezartzea" eskatu die Legebiltzarreko alderdiei.

PSOE eta Unidas Podemosen arteko akordioa

Urkullu prest agertu da Espainiako gobernagarritasuna bermatzeko, ekonomia, gizarte, lurralde eta politika arloko erronkei "denbora galdu gabe" erantzun ahal izateko.

Lehendakariak "aprobetxatu beharreko aukera" gisa baloratu du agertoki berria; elkarrizketaren eta akordioaren bidera itzuli izana nabarmendu du, eta euskal autogobernua errespetatuko duen eta hartutako konpromisoak beteko dituen gobernu berri bat martxan jartzea espero duela gaineratu du.

Halaber, Urkulluren esanetan, PSOEk eta Unidas Podemosek lortutako aurreakordioak argi erakusten du "diskrezioz, borondatez eta errealismoz" jokatzen denean posible dela "elkar ulertzea eta akordioak lortzea".

"Asko dago egiteko, baina nabarmena da jarrera politikoan gertatu den aldaketa positiboa", esan du Urkulluk, bi alderdien arteko hurbilketari erreferentzia eginez.

Nolanahi ere, azaldu du beharrezkoa dela "konfiantza giroa" ziurtatzea eta bi alderdiek "konpromisoen programa bat" adostea. Testuinguru horretan, "muturreko konplexutasuna" duen agertoki politiko eta sozial baten aurrean "begirunez" jokatzeko beharraz ohartarazi du.

"Euskadin korrespondentzia"

Alderdi Sozialistaren eta Unidas Podemosen arteko balizko koalizio-gobernu batek Estatuaren lurraldetasunaren arazoari "errealismoz" aurre egitea espero duela esan du Urkulluk. Gobernuak egiteko dituen zereginen artean, hauek sartzea espero duela gaineratu du: ekonomia produktiboa bultzatzea, azpiegituretan inbertitzea, lan erreforma "sakon" aldatzea, pentsio sistemarako "bermeak" ezartzea eta klima aldaketaren erronkari erantzutea.

Estatuko "akordio esparru hasiberriak Euskadin korrespondentzia aurkitzea" ere espero duela esan du lehendakariak, eta Gobernuak Gernikako Autonomia Estatutua "osorik" betetzeko dituen konpromisoak betetzeko nahia agertu du.

"Ez dago denbora galdu beharrik gobernagarritasuna bermatzeko eta lurralde eta politika mailako erronka ekonomikoei erantzuteko", adierazi du lehendakariak, eta zeregin horretan laguntzeko "erabateko prestasuna" agertu du.