Altsasuko Gurasoak: 'Berriro gerta ez dadin ari gara borrokan'

2016ko urriaren 15ean hasi zen amesgaiztoa Altsasuko Koxka tabernan. Hainbat gaztek bi guardia zibilekin eta haien bikotekideekin liskarra izan zuten, eta horrek ondorio gogorrak ekarri dizkie gazteei. Auzitegi Gorenak bederatzi urte eta sei hilabetera arteko zigorrak ezarri zizkien zortzi auzipetuei.

Gazteen gurasoek auziaren "proportzionaltasun eza" eta "bidegabekeria" salatu dute hasieratik. Radio Euskadiko 'Cronica de Fin de Semana' saioan, hiru guraso elkarrizketatu ditu Ander Arzak kazetariak: Antxon Ramirez de Alda, Adur Raminez de Aldaren aita, Edurne Goikoetxea, Ainara Urkijoren ama, eta Gotzon Urrizola, Aratz Urrizolaren aita. Euren seme-alabekin gertatzen ari dena "berriro gerta ez dadin" ari direla borrokan ziurtatu dute.

Gorenaren epaia jakin zenetik, gaur egingo da Altsasuko gazteei elkartasuna adierazteko lehen ekimen handia, Nafarroako hiriburuan, Altsasukoak Aske eta Altsasuko Gurasoak plataformek deituta. Duintasunaren Martxa deitu diote ekimenari, eta besteak beste, goizeko 09:00etan bizikletaz abiatuko dira Altsasutik Iruñera, bidean geldialdiak eginez. Ekitaldi nagusia Nafarroako hiriburuan egingo da, 17:00etan. Elkarretaratzea egingo dute Nafarroako Justizia Auzitegi Nagusiaren aurrean.

(Jatorrizko elkarrizketa, gaztelaniaz)