Politika -
PRESOAK
'Dispertsioaren biktimen memoria' aitortzeko ekitaldia deitu du Etxeratek Gernikan
Azaroaren 23an egingo dute ekitaldia, eta, besteak beste, 'senideen kondenarekin behin betiko amaitzeko premia' aldarrikatu nahi dute.
AGENCIAS | REDACCIÓN
Etxerat presoen senideen elkarteak "dispertsioaren biktimen memoria eta aitortza" eskatzeko ekitaldia egingo du azaroaren 23an Gernikan, eta bertara joateko deia egin dute gaur.
Etxeratek ekitaldia aurkeztu du igande honetan, Bilbon. "Espainian espetxe politika mantentzen dutenei dei egiteko" helburua du ekimenak, sakabanaketa eta urruntzearekin amaitzea premiazkoa delako. "Sakabanaketa sufritzera zigortzen gaituzte", kritikatu dute presoen senideek.
30 urte baino gehiago eman dituzte "bizitza jokoan" jartzen errepideetan astebururo, erantsi dutenez. Horrela, "epaituak izan gabe zigortu gaituzte", salatu dute presoen senitartekoek eta lagunek. Euren delitua "senidea izatea eta presoak maitatzea da", gaineratu dute.
Sakabanaketaren biktima horien "memoria eta aitortza aldarrikatuko" dute Gernikan. Era berean, espetxe politika aldatzea eta senideak jaioterritik gertuago dauden kartzeletara lekualdatzea eskatuko dute ekitaldian.
Etxeraten arabera, sakabanaketak 16 hildako eta ia 1.000 zauritu utzi ditu dagoeneko.
