Junquerasen immunitateaz galdetu dio Gorenak Europako Justizia Auzitegiari

Oriol Junqueras Generalitateko presidenteorde ohiaren immunitatea zenbaterainokoa den argitzeko eskatu dio Auzitegi Gorenak Europako Justizia Auzitegiari. Eurodiputatu bihurtzeko tramiteekin jarraitzeko espetxetik ateratzea eragotzi zion Gorenak Junquerasi.

Fiskaltzaren eta Estatuko Abokatutzaren kontrako txostenak eta proces auziko akusatu nagusiaren eskakizuna mahai gainean dituela Luxenburgori galdetzea erabaki du Gorenak. Kartzelatik ateratzeko baimena eskatu zuen Junquerasek, ekainaren 17an Konstituzioari men egiteko Kongresuan.

Aretoaren hitzetan, erabakiak Junquerasen immunitateari eta behin-behineko espetxealdiari soilik eragiten die, baina proces auzi nagusiarekin menpekotasun harremana du.

Bestalde, Carles Puigdemont Generalitateko presidente ohiaren eta Toni Comin kontseilari ohiaren (Europako Parlamenturako JxCaten zerrendaburuak) defentsak Junquerasen eskakizunarekin bat egin du, eta Luxenburgori immunitatearen inguruan galdetzea eskatu dio Auzitegi Gorenari. Europako Parlamentuko hautetsi batek ze unetan duen immunitate parlamentarioa zehaztu behar du Luxenburgok.

Eurodiputatu agiria eskuratzeko, Madrilen Konstituzioa aurrez aurre zin egiteko tramitea inposatzearen inguruan Luxenburgori galdetzea eskatu du dokumentuak, baita immunitate parlamentarioa zenbaterainokoa den eta Hauteskunde-batzorde Zentralaren funtzioei buruz ere.

Gainera, irakurketaren inguruko galdera dela ohartarazi dute abokatuek: "ez da bakarrik beharrezkoa, derrigorrezkoa baizik, onartzen ez baldin badute oinarrizko eskubideak urratuko liratekeelako".

"Arau nazionalen eta EBko legeen arteko kontraesan argiak daude, eta horrek irakurketaren inguruko zalantzak areagotzen ditu", azaldu dute defentsek.

"Europako Justizia Auzitegiaren eta Espainiako organo judizialen arteko elkarrizketa etengabea" eskatzen ari direla nabarmendu dute.