Barcenas: 'PPk ezabatutako informazioa B kontabilitateari buruzkoa zen'

Luis Barcenasek deklaratu du gaur Alderdi Popularrak bi ordenagailu frogak ezkutatzeko suntsitu zituen argitzeko auzian, Madrilgo Zigor Arloko 31. Epaitegian.

Epaiketan, Alderdi Popularreko aholkulari juridikoak eta Carmen Navarro kudeatzaile ohiak ere deklaratu dute. Ordenagailuak alderdiarenak zirela, sartzeko pasahitzik behar ez zela eta memorian daturik edo informaziorik gordetzen ez zutela adierazi dute. Horrenbestez, ordenagailuak ezabatzea agindu zutela erantsi dute.

Alabaina, Barcenasek kontrakoa azaldu du. "Ordenagailu biak nireak ziren, sartzeko pasahitza jartzea beharrezkoa zen eta informazio adierazgarria gordetzen zuten", azpimarratu du.

"Toshiba ordenagailuan kalkulu-orriak, kontu korronteen datuak, alderdiaren aurrekontuak, kanpainak nola finantzatzen ziren eta beste hainbat datu gordetzen nituen", esan du.

Apple ordenagailua, berriz, "ordainagirien kopiak, 1990etik 2008ra bitarteko paperen osagarriak, dokumentuak, kanpainetako aurrekontuak eta kanpaina horiek nola finantzatu ziren azaltzen zuten agiriak gordetzen nituen".

Hori bai, Barcenasek adierazi du berak ez zuela inolako asmorik dokumentu horiek guztiak publiko egiteko, Alvaro Lapuerta diruzain ohiarekin batera kudeatu zuen "informazio konfidentziala" zelako.

Hala ere, geroago eta bere abokatuarekin hitz egin ostean, "informazio historikoa, delikatua eta adierazgarria" Justiziaren esku uztea erabaki zuen.

Barcenasi 33 urteko espetxealdia ezarri zioten Gurtel auziaren baitan. Madrilgo Soto del Real espetxean ari da zigorra betetzen.

Cospedalek dio berak ez zuela agindu ordenagailuak deuseztatzea

Bestalde, gaurko saioan Maria Dolores de Cospedal PP idazkari nagusi ohiak ere deklaratu du, eta ukatu egin du Barcenasen ordenagailuak suntsitzeko agindua eman zuela.

"Suitzan kontu irregular bat 40 milioirekin zituela jakin zenean, errugabetasun printzipioa pikutara joan zen; gertakari eskandalagarria eta lotsagarria izan zen", adierazi du.

Horren aurrean, Barcenasi PPk Madrilgo Genova kalean daukan egoitza nagusira sartzeko baimena galarazi ziola erantsi du Cospedalek.