Mendia:'Sozialistok irabaziko ditugu hauteskundeak, baina garaipen sendoa behar dugu'

Idoia Mendia PSE-EEren idazkari nagusiak ez du "zalantzan jartzen Alderdi Sozialista izango dela bozkatuena apirilaren 28ko hauteskunde nagusietan", baina "garaipen sendoa" behar dutela esan du "eskuina geldiarazteko", bestela, oinarrizko eskubideak gal daitezkeelako, eta horregatik, "etxean geratzea eskuineko aliantzari atea irekitzea" dela ohartarazi du.

"Hurrengo hauteskundeetan jokoan daude guretzat hain garrantzitsuak diren balio demokratikoak, jokoan dago emakume guztion askatasuna, jokoan daude gure eskubideak bermatzen dituzten hainbat zerbitzu publiko. Jokoan dago gure autogobernua. Inflexio puntu baten aurrean gaude" hausnartu du EAEko sozialisten buruak.

Bilbon, euskal sozialistek apirilaren 28ko zein maiatzaren 26ko Europak hauteskundeetarako zerrendak onartzeko egin duten Ezohiko Batzorde Nazionalean hitz egin du igande honetan Mendiak eta une hau zein "delikatua" den nabarmendu utzi nahi izan du: "Eskuineko alderdien batasunak arriskuan jartzen ditu eskubide berdintasuna eta gizarte pluraltasuna". "Lau hamarkada egin ditzakegu atzera" hausnartu du.

Horri aurre egiteko, "euskal herritarrek jakin behar dute funtsezkoa dela sozialistak gobernuan mantentzea gaur dugun bizi mailan atzera ez egiteko". EAEko autogobernua kolokan egon daitekeela uste du Mendiak eta horregatik ezin dela "inor etxean geratu" adierazi du. PSEren hautagaiei boto guztiengatik borroka egiteko eskatu die, "asko" dagoelako jokoan.

Espainian sozialistak Gobernuan daudenean Euskadi ondo doala ere gaineratu du, eta hori lortu behar dela berretsi du.