Gorordoren eta Zabaletaren babesa jaso du Jone Goirizelaiak Bilboko alkatetzarako

EH Bilduk Bilboko Udalerako bere hautagaia aurkeztu zuen atzo: Jone Goirizelaia abokatu eta parlamentarioa. Ekitaldian, hainbat aurpegi ezagun izan ziren, tartean, Jose Maria Gorordo Bilboko alkate izandakoa (EAJtik) eta Gemma Zabaleta Eusko Jaurlaritzako sailburu ohi sozialista. Babesa agertzera joan ziren baita Esther Larrañaga sailburu ohia, Iñigo Cabacasen gurasoak eta Eva Ferreira Athleticeko jokaria, besteak beste.

Goirizelaia harro agertu zen bilbotarrengatik eta gogorarazi zuen azken urte honetan Bilbo munduko komunikabide nagusienetan atera dela bertan egin diren manifestazio handiengatik: bai martxoaren 8koagatik, bai pentsiodunen manifestazioengatik, eta berriki, Athleticen emakumezko taldeak izandako ikusle arrakastagatik, "eta hori guztia, instituzioen babesik gabe" erantsi zuen.

Ildo horretan, egungo udal taldeak "mugimendu feministari bizkarra" eman diola salatu zuen, "oraindik ere ez dakigu zergatik jarraitzen duen Bilbok Emakumeen Etxerik gabe". "Egungo Gobernua ez dago Bilbok behar duen mailan" gaineratu zuen.